في نسخة النهارده من #ورا_المزيكا عملنا مقابلة حصرية مع المغني، الممثل وأيقونة السوشيال ميديا مروان يونس. بقى من الطبيعي إن مع كل أغنية جديدة بينزلها في الصيف إنها تحقق نجاح كبير. للسنة الثالثة على التوالي بينزل مروان بأغنية جديدة في الصيف تكسر الدنيا وتلاقيها بتتلعب في كل حتة في الساحل الشمالي. فبعد نجاح “إيه يلا ده” و”الفرافير” نزل مروان السنة دي بأغنية “بكرهكوا كلكوا” واللي حققت آلاف المشاهدات عبر كل وسائل التواصل الاجتماعي. اتكلمنا مع مروان عن آخر أغانيه وعن مشاريعه المستقبلية في التمثيل.
إزاي جاتلك فكرة الأغنية الجديدة؟
فكرة الأغنية جاتلي إني فتحت الفيسبوك في يوم الأيام لقيت كل الناس بتشتم في بعض وكل الناس بتتكلم في حاجات سلبية فهربت من فيسبوك لإنستجرام لقيت حد شتمني على إنستجرام بدون أي سبب خالص. وقاعد اقرأ في الكومنتس لقيت قد إيه الناس بتنشر طاقة سلبية فلقيت ان دة الموود العام وهو “بكرهكوا كلكوا” كل الناس بقت بتكره كل الناس. وبعدين قعدت فكرت فيها هل في حد كتب أغنية عن الكره قبل كده؟ حسيت لأ محدش عمل كده وهيبقى لذيذ إننا نجرب حاجة زي دي.
ايه ردود الأفعال اللي جاتلك لغاية دلوقتي؟
ردود الأفعال اللي جاتلي لغاية دلوقتي إن الأغنية بتمثلهم.. يعني جملة “هذه الأغنية تمثلني”، والأغنية دي بتعبر عن الوضع الحالي دة كان رد الفعل الأساسي. يعني حتى كان في حد كاتب لو ٢٠٢٠ اغنية فـ “بكرهكوا كلكوا” هتكون الأغنية. عجبني أوي الرآي دة من كتر ما ٢٠٢٠ داخلة فينا شمال. رد الفعل الثاني إن الناس عجبها الجو التسعيناتي في الأغنية واحساس النوستالجيا دة وفي ناس معجبهاش وده الطبيعي. يعني كانت مثيرة للجدل أكثر من أي اغنية عملتها قبل كدة ،الأغاني اللي عملتها قبل كدة كانت اهيف من كده. ودة رد الفعل حتى الآن.
ليه اختارت الأغنية دي تكون أغنية الصيف السنة دي؟
اختارتها لأن هو ده اللي شغال دلوقتي ده اللي الناس كلها حساه، ده اللي السنة عاملاه فينا مع كل الأحداث اللي بتحصل من أول ما السنة بدأت أنا حسيتها ملخص للسنة. بس برضه مكنتش عايزها تطلع أغنية سلبية تقيلة أو حزينة أوعنيفة بالعكس أنا عاملها بالـ tune اللذيذ ده عشان هي “بكرهكو كلكو” وجنبها قلب. هي قمص أكتر من كره فعشان كده اختارت الموضوع ده.
هل في خطة إنك تنزل بأكتر من أغنية واحدة في السنة؟ (أكتر من أغنية واحدة في الصيف)
أنا فعلًا عندي خطط وفي أغنية بدأت تصيغ في مخي وأنا شغال على أغنية “بكرهكوا كلكوا” في ميلودي معلقة كده وطريقة معينة في الغنا عايز أجربها بس هي غالبًا هترجع لطريقة المهرجانات اللي بدأت بيها في الفرافير. لأن ده اللي بيليق على طريقة غنايا أنا مش مغني.. أنا صانع محتوى.. مش بتاع طرب فالشغل اللي فيه زعيق و Auto-tune بالنسبة لي يجيب نتيجة احسن وأنا فعلًا في ألحان بدأت تشتغل في مخي وغالبًا هشتغل عليها. مش عارف هنزلها بقى السنة دي ولا هستنى سنة بس مفيش ديدلاين ولا قواعد في صناعة المحتوى.
لما بتصنع اغنية ايه بييجي الأول الكلمات ولا الموسيقى؟
الموسيقى بتيجي الأول بصراحة أو اللحن الرئيسي. يعني أما ببتدي افتح السوفتوير عندي ببتدي العب كده أي نغمات خصوصًا لو معلقة في دماغي بقالها فترة وبحط عليها beat وبعدين بألف عليها الكلام.
هل في مشاريع مستقبلية في التمثيل؟
أنا هظهر في شهر نوفمبر في مسلسل هينزل على منصة شاهد.. المسلسل تأليف أدم عبد الغفار والحلقة دي هيكون هو مخرجها. وهعمل مشهد قدام إياد نصار ودي بالنسبة لي كانت تجربة حلوة جدًا. هو مشهد صغير تقريبًا نفس حجم المشهد اللي عملته في فيلم الفيل الأزرق بس بالنسبة لي تجربة عظيمة لأنها قدام إياد نصار ومع مخرج أنا بحبه جدًا. ومحدش يعرف المستقبل مخبيلنا إيه كل فترة يطلع لي فرصة وإن شاء الله هيبقى في حاجة لذيذة جاية.
إيه هي مشاريعك المستقبلية؟
مفيش حاليًا مشاريع أو خطط محددة لغاية دلوقتي هو بس الحاجة الوحيدة اللي في الأفق حاليًا هي مهرجان الجونة اللي عايز اكون جزء منه بطريق أو أخرى.. عايز أقدم حاجة لطيفة فيه، ممكن برنامج تليفزيوني قصير أو محتوى ديجيتال. غير كده أي حاجة ليها علاقة بالتمثيل ده شغال.. ده غير إن برنامجي على الراديو أنا بكبره كل فترة ودي حاجة هتفضل موجودة. وبنسبة كبيرة هشتغل على برنامج تلفزيوني كبير قريبًا، أنا كنت فعليًا شغال على برنامج ولكن مكملناش بسبب كوفيدـ١٩واللي حصل في العالم كله.
بعد تجربة التمثيل، والغناء، وصناعة المحتوى والتقديم التليفزيوني إيه تاني عايز تكتشفه وتجربه؟
والله بعد التمثيل والغنا وصناعة المحتوى والتقديم التليفزيوني.. أنا مش عارف هو فاضل إيه في المجال بتاعنا ده أجربه يعني لسه معرفش بس ممكن ستاند أب كوميدي ودي حاجة عمري ما عملتها قبل كده بس تبقى على شكل جولة منظمة.. جولة تتعمل في بلاد يمكن دي حاجة مكتشفتهاش لسه وأحب اني اكتشفها. ممكن برضو دي-جي لسه كنت بتكلم امبارح مع ناس اصحابي بقولهم إن أنا اما كان عندي ١٤ سنة كنت بلعب Electronic Music (موسيقى إلكترونية) وطول عمري كان نفسي ابقى دي-جي فدي حاجة ممكن برضو ابقى حابب أجربها.
ايه المواضيع اللي نفسك تغني عنها؟
المواضيع اللي نفسي أغني عنها بيبقى عادًة مواضيع محدش اتكلم فيها قبل كده.. أو متعملش في أغنية قبل كده. دايمًا بسأل نفسي أنا عملت “الفرافير” يعني حد عمل مهرجان او أٌغنية عن حد معندوش مشاكل خالص في الحياة.. فدايمًا الأغنية بتناقش مشكلة.. فدايمًا هختار موضوع مثير للجدل وأعمل عنه أغنية.