تصدرت مصر أهم الأسواق السياحية المطلوبة من الإسبان على موقع (elconfidencial digital) الإسباني خلال سنة 2023، أكد الموقع كمان إن مصر كانت من أكتر الوجهات المطلوبة في 2022، واتوقع إن الازدهار في قطاع السياحة المصرية هيستمر في سنة 2023.
وحسب التقرير اللي نشره الموقع اعتبر إن الخيارات السياحية في العالم كتير، لكن وصف السفر لمصر بـ “تجربة فريدة لا تضاهى”.
أما موقع جريدة (ديلي ميل) البريطانية فنشر تقرير صحفي عن الميزة التنافسية اللي بيتمتع بها المقصد السياحي المصري بالنسبة للسياح البريطانيين، واللي يقدروا يقضوا فيه أجازة طويلة بتكلفة قليلة.
نصح الموقع البريطانيين يهربوا من برد الشتاء في بلادهم والسفر لمصر وزيارة مدنها السياحية وطقسها المشمس الدافئ، وقال إن الأجازة ممكن توصل لشهر كامل بنفس تكلفة الوقت اللي بيقضوه في بيوتهم خلال أيامهم العادية.
جت تصريحات عمرو القاضي الرئيس التنفيذي للهيئة المصرية العامة للتنشيط السياحي، في التقرير، واللي قال فيها إن السياح الأوروبيين يقدروا يزوروا المقاصد السياحية المصرية علشان يقضوا فصل الشتاء تحت شمس مصر الدافئة وبتكلفة قليلة، وفي نفس الوقت يستمتعوا بتجارب سياحية جديدة رائعة.
جريدة واشنطن بوست تختار مصر ضمن أفضل عشر وجهات سياحية
اختار موقع الجريدة الأمريكية (واشنطن بوست) مصر الوجهة السياحية الأفضل في العالم ضمن قائمة من 12 مقصد سياحي احتلت مصر المرتبة رقم 5 فيهم.
قال الموقع إن جوناثان ألدر، صاحب شركة السياحية الفاخرة (جوناثان ترافلز)، حجز عدد كبير من الرحلات لمصر للعملاء في السنتين اللي فاتوا أكتر من اللي كل الحجوزات اللي عملتها الشركة على مدار العشر سنين اللي فاتوا، وقال إن الطلبات بتزيد بسرعة في سنة 2023 “فضلنا نحجز رحلة ورا التانية”.
بيرجح الموقع إن الاهتمام المتجدد يرجع للافتتاح المتوقع للمتحف المصري الكبير، زيّ ما بتقول ياسمين بادا، خبيرة الوجهات المصرية في (كينسينجتون تورز)، وقالت إن عدد الرحلات اللي بيتم حجزها لمصر بيزيد في شكل خطوط الرحلات البحرية الرئيسية بالإضافة للإبحار في المنطقة.
أما كارولين أديسون، رئيسة المنتج في شركة السياحة الفاخرة بلاك توماتو، فبتنسب الفضل في ازدهار القطاع السياحي المصري لمكانة مصر الرائجة في القوائم السياحية الكلاسيكية عند الأوروبيين.
بتقول أديسون، إن في ناس كتير بتقول:” كان نفسي دايمًا أشوف الأهرامات”، أو ناس بتحط دايمًا في قوائم الحاجات اللي نفسها تحققها: “كان نفسي دايمًا أعمل كروز في النيل”.
وعلشان مصر دايمًا في قائمة أي حد نفسه يسافر يشوف العالم، ساعدت المشاريع السياحية الجديدة على تسهيل السفر والإقامة في مصر، وجذبت التحسينات على نظم السياحة ووجهات السفر في مصر، سياح أكتر وأكتر خلال السنة اللي فاتت، وهو الازدهار اللي بيتوقع الخبراء إنه يستمر خلال السنة الحالية.
المشاريع السياحية اللي نجحت في ازدهار القطاع مؤخرًا دي مهمة جدًا في ظل أزمة نقص الدولار اللي بتمر بها مصر حاليًا، وبالتالي لازم نشتغل على قطاع السياحة بشكل جاد علشان نزود عدد السياح اللي جايين يزوروا مصر بعملة أجنبية ضرورية لحل الأزمة الحالية.