واتساب وتحديث جديد يسمح بإرسال صور وفيديو ماينفعش تتشاف غير مرة واحدة

واتساب واحد من أكتر الأبليكيشنز أو التطبيقات المنتشرة حاليًا واللي كلنا بنستخدمها في التواصل ما بيننا وبين بعض، مش بيعدي يوم كل واحد مننا مش بيفتح الواتساب علشان يتواصل مع معارفه. ومن وقت قريب بدأنا نستخدم واتساب مش بس علشان نتواصل وندردش مع صحابنا وأهلنا ولكن كمان دخل حيز البزنس.

خلال فترة الحجر الصحي السنة اللي فاتت، زاد استخدام واتساب جدًا بعد ما كلنا لقينا الوسيلة الوحيدة للتواصل مع ناس تانية هي الانترنت. وفي الوقت الحالي في شركات كتير بدأت تستخدم تطبيق الواتساب في استقبال طلبات التوصيل للمنازل وحتى الحكومة المصرية دخلت الواتساب في وسائل التواصل مع بعض الجهات الحكومية بالذات في ما يتعلق بالصحة وفيروس الكورونا واللقاح.

أعلن تطبيق واتساب من خلال الموقع الخاص بيه عن تحديث جديد قريبًا يسمح للمستخدم بإرسال صور وفيديوهات ماينفعش تتشاف غير مرة واحدة بس.

وأعلن الموقع إن التحديث الجديد هيكون فيه نفس الميزة اللي على الإنستجرام واللي بتسمح للمستخدمين في اختيار فعالية فتح الصور والفيديوهات اللي بيبعتوها، بحيث يقدر المستخدم يحدد إذا كان المستقبِل ينفع يشوفها أكتر من مرة ويحفظها على تليفونه ولا ماينفعش يشوفها غير مرة واحدة بس مع عدم الاحتفاظ بالصورة أو الفيديو على ذاكرة التليفون.

والصور والفيديوهات اللي اتحددت إنها تتشاف مرة واحدة هتختفي من الدردشة أول ما المستقبِل يفتحها ويشوفها، والموقع ذكر إن الهدف من التحديث ده هو الحفاظ على مساحة الذاكرة في التليفون لوقت أطول، وكمان علشان يحافظ على خصوصية المرسل والمستقبِل.

وكمان التحديث الجديد هيسمح للمستخدم إنه يعرف إذا كان المستقبل شاف الصور أو الفيديو ولا لأ.

والموقع ماحددش بالظبط امتى التحديث ده هينزل ولكن أكد إنه هينزل قريب جدًا.

وقال إن التحديث ده هيشتغل على التليفونات الأندرويد والتليفونات اللي بتشتغل بخاصية الأي أو أس. والتحديث ده زيّ ما قولنا كان موجود بالفعل في تطبيق الإنستجرام المملوك أصلًا من قبل شركة واتساب وفيسبوك.

آخر كلمة: ماتفوتوش قراءة.. مصر تعين سفير فوق العادة في قطر: هل الأزمة القطرية مع مصر ودول الخليج هتنتهي؟

تعليقات
Loading...
Tweet
Share
Share
Pin