هنا جودة اتصدرت تصنيف تنس الطاولة العالمي

هنا جودة لاعبة النادي الأهلي ومنتخب مصر لتنس الطاولة، والمصنفة رقم واحد عالميًا في اللعبة دي تحت سن 15 سنة، والمركز التالت عالميًا تحت 17 سنة، النهارده حققت إنجاز جديد في اللعبة بعد ما اتقدمت 653 مركز وانتقلت من المركز الـ1060 لـ407 بس المرة دي في تصنيف السيدات. وبكده تبقى أصغر لاعبة تتصدر التصنيف العالمي في فئة السيدات.

مين هي هنا جودة؟

هنا جودة اعتبرتها كل الصحف أمل مصر في تنس الطاولة باعتبارها أصغر لاعبة فيها، وشاركت في أولمبياد طوكيو وكانت أصغر واحدة من ضمن 143 لاعب ولاعبة. هنا بدأت مسيرتها الرياضية وهي عندها أربع سنين، بدأت برياضة الجمباز لمدة صغيرة قبل ما تروح لرياضة السباحة وكرة اليد وفضلت تتمرن فيهم لمدة سنة لحد ما استقرت على رياضة تنس الطاولة في النادي الأهلي.

ولما بدأت تلعبها كان على سبيل التجربة لإنها كانت صغيرة جدًا لدرجة إنها كانت أقصر من الطاولة نفسها، فكانوا بيقصروا لها الطاولة علشان تناسب طولها. وقعدت فترة تتدرب في اللعبة لحد ما بدأت موهبتها فيها تظهر بالتدريج، وفي الوقت ده أهلها كان ليهم دور كبير علشان اللعبة دي تبقى بداية حقيقية لمسيرتها المهنية وماتبقاش مجرد لعبة للتسلية وخلاص.

طب وإنجازاتها؟

هنا تعتبر أول لاعبة مصرية وعربية تتصدر التصنيف العالمي تحت سن 15 سنة، وكسبت قبل كده الميدالية الذهبية في بطولة سلوفينيا الدولية للناشئين وخدت المركز الأول فيها، وفي الجزائر فازت ببطولة الجزائر الدولية سنة 2016 وكان عندها في الوقت ده تمن سنين! وأخدت البطولة التونسية في 2018، وفي نفس السنة فازت ببطولة أفريقيا، وفي 2017 جابت الميدالية الفضية في البطولة السويدية.

هنا جودة أو “الطفلة المعجزة” زيّ ما بيقولوا عليها لإنها فعلًا كده، هي موهبة استثنائية اختارها الاتحاد الدولي لتنس الطاولة علشان تكون ضمن مجموعة الأمل اللي بيرعاها وبيخليها تشارك في كل البطولات الدولية اللي بتقام في كل دول العالم.

أخر كلمة: ماتفوتوش قراءة: إبراهيم حمدتو لاعب مصري خطف كل الأنظار في الألعاب الباراليمبية

تعليقات
Loading...
Tweet
Share
Share
Pin