الأعياد بشكل عام والكريسماس بشكل خاص، حلاوتهم بتكون في وجود العيلة والناس اللي بتحبهم حوليك. هي دي “التقاليد” الاحتفالية اللي احنا اتعودنا عليها.. وأي خرق للعادات دي، بيخلينا نحس بشكل لا إيرادي، إن في مشكلة، وإن عدم وجود الناس حولينا معناه إننا مانقدرش نحتفل. وفي أسباب كتير ممكن تخليك تقضي الكريسماس لوحدك..
سواء لظروف شغل، عدم وجود إمكانية للسفر أو الفترة دي، لوجود وباء منتشر في العالم، كتير من الناس وخصوصًا السنة دي ممكن ما يكونش عندهم الفرصة إنهم يجتمعوا مع أحبابهم في الوقت ده. بس هل عدم وجود ناس حوليك معناه إنك لازم هتقضي كريسماس حزين ووحيد؟ لأ طبعًا! تقضية الكريسماس لوحدك في حد ذاته تجربة مختلفة تقدر من خلالها تعمل حاجات جديدة، أو على الأقل تشيل من عليك حمل بعض الحاجات اللي بتضطر تعملها غصب عنك لما تقضي الكريسماس مع العيلة.
زيّن المكان اللي أنت قاعد فيه
زينة الكريسماس حوليك هتديلك إحساس بالجو الاحتفالي وهتقدر تـ relate للجو اللي أنت متعود عليه لو عيلتك دايمًا بتزين البيت الوقت ده من السنة. فجيب ديكورات زينة مشابهة، علشان تدي موود من البهجة للمكان اللي أنت هتقضي فيه الكريسماس.
اسمع أغاني مُتعلقة بالكريسماس
أثناء تزيينك للمكان، ممكن تشغل أغاني مختلفة متعلقة بالكريسماس، علشان تسعدك أكتر في خلق روح وموود احتفالي. وبما إنك هتكون لوحدك، فهتقدر تغني بصوت عالي وترقص بالطريقة اللي أنت عايزها، من غير ما حد يتريق أو يحكم عليك!
اعمل Christmas cookies
حلويات الكريسماس جزء أساسي لا يتجزأ من الاحتفال! فحتى لو مالكش في المطبخ، ممكن تطلع وصفات مختلفة لكوكيز وحلويات الكريسماس وتعمل الـ desert المفضل بالنسبة لك، والأغاني شغالة في الخلفية وراك.
اعمل movie night مع نفسك
الكوكيز بتاعتك جانبك، الماج بالـ hot chocolate في إيدك، ومش هيبقى ناقصك حاجة علشان تعمل قاعدة كريسماس محترمة مع نفسك. افتح أفلام كريسماس واستمتع بيهم وأنت بتاكل حلوياتك المفضلة وبتشرب مشروب الكريسماس الرسمي، شوكلاتة دافية ومعاهم marshmallows!
ابعت كروت معايدة للناس اللي بتحبهم
احنا عارفين إنك تقدر تبعت لهم رسالة على الواتس أب بكل بساطة، ولكن طرق المعايدة القديمة واستخدام الكروت ليهم طابع خاص كده. فممكن تعمل كروت معايدة لكل الناس اللي بتحبهم وكان نفسك يكونوا معاك في اليوم ده.
خطط لاحتفال السنة اللي الجاية
لو أنت من النوع اللي بيهتم باحتفالات الكريسماس ومضايق إنك ماعرفتش تعمل حاجات معينة السنة دي، يبقى من الحاجات اللي هتفرق معاك، هو استغلال اليوم ده للتخطيط لاحتفال السنة اللي جاية. فكر في الأماكن اللي عايز تروحها، الناس اللي نفسك يكونوا معاك، وحتى الوجبة اللي عايز تاكلها. فكر في كل وأدق التفاصيل، و visualize اليوم. ممكن كمان تبدأ تاخد خطوات أكثر جدية زيّ إنك تدور على أماكن وتذاكر للطيران اللي ممكن تحتاجهم لو هتسافر، علشان تتحمس!