نيوكوف: فيروس جديد من الخفافيش ممكن يهدد البشر بعد طفرة واحدة

لسه ماخلصناش من كوفيد-19 واللي عمله في العالم، وكمية السلالات والمتحورات اللي بنكتشفها، والعالم كله بيسعى بكل جهده علشان نلاقي حلول سريعة نخلص بيها من الكابوس ده، فكمان نكتشف فيروس جديد من الخفافيش، اسمه NewCov – نيوكوف، والعلماء مستمرين في الأبحاث والدراسات علشان نعرف أكتر عنه وعن مدى خطورته، لكن لحد دلوقتي المعلومات المتوفرة مش كفاية، لكنها بتشير لخطر ممكن تواجهه البشرية بعد طفرة واحدة فقط.

لحد دلوقتي، الفيروس بينتقل بين الخفافيش بس، لكنه بعد طفرة واحدة فقط هيسبب خطر على البشرية في إمكانية انتقاله للإنسان، العلماء الصينيين أعلنوا إن “نيوكوف” هو نوع من الفيروسات التاجية اللي تم اكتشافها في الأصل في جنوب أفريقيا، لكن لو حصل وانتقل للبشر، هيكون أكثر انتشار وخطورة من كوفيد-19.

وفي ورقة بحثية تم نشرها على موقع “bioRxiv ” ذكر الباحثين إن “نيوكوف” هو واحد من عائلة فيروس متلازمة الشرق الأوسط التنفسية (ميرس – كوف) وإن الفيروس الجديد ربما يكون مرتبط بفيروس”MERS-CoV” المعروف باسم متلازمة الشرق الأوسط التنفسية، واللي انتشر في عدد من دول الشرق الأوسط قبل كده، ومشابه للفيروسات التاجية الأخرى، ومن الممكن إن يحصله تحور يتسبب في إصابته للبشر.

منظمة الصحة العالمية ناشدت بعدم التسرع بتقديم الاستنتاجات قبل إجراء دراسات أكتر، لإن حتى الآن الدراسات والأبحاث اللي اتعملت عن “نيوكوف” تعتبر غير كافية، ومفيش داعي للتسبب في نشر الذعر. لكن كمان لازم نكون على دراية بكل اللي بيحصل حولينا.


آخر كلمة: ماتفوتوش قراءة: من المروحة ولا أوميكرون؟ ازاي نفرق بين البرد العادي والمتحورات الجديدة ؟

تعليقات
Loading...
Tweet
Share
Share
Pin