نيفين درويش: أول ست عربية ضمن 6 في العالم كله تقود أكبر طائرة ركاب

كابتن نيفين درويش، سجلت اسمها في التاريخ لعالم الطيران، أول ست مصرية وعربية تقود طائرة إيرباص 380، أكبر طائرة ركاب في العالم، وكمان هي واحدة من ضمن 6 سيدات في العالم كله اللي قدروا يحققوا ده، نيفين مش بس اقتحمت مجال كان بيتشاف على إنه “للرجال فقط” لكن كمان أثبتت جدارتها وإنها قد المسئولية.

سجل يا تاريخ….
يشرفني ان اسجل انجازا هائلا في تاريخ المرأة المصرية واسجّل اسم مصر في التاريخ لعالم الطيران لكوني أول…

Posted by Nevin Darwish on Monday, March 7, 2022

أول رحلة قامت بيها نيفين كانت من الإمارات لفيينا في 2017، لما شركة طيران الإمارات حبت تشجعها في يوم المرأة العالمي، بإن تكون أول رحلة لها بأضخم طيارة ركاب في العالم في يوم مميز زي ده، والرحلة كانت بمشاركة مساعدتها الأولى، الإماراتية عليا المُهيري، أصغر ضابط أول في الإمارات. الرحلة كانت تجربة لاتنين من أعظم الستات اللي بيمثلوا بلدهم والوطن العربي كله في مجال الطيران.

وعن تجربة الطيران المميزة دي، قالت عليا المهيري: “كابتن نيفين درويش حقاً طيارة ماهرة ومميزة للغاية، وتتسم بطباع هادئة أثناء الطيران تحت أي ظروف، ودائمًا تأتي للعمل كل صباح بنفس الابتسامة والإشراقة مثل أول يوم عمل”.

وبالحديث عن رائدات في مجال الطيران، بنفتكر كابتن لطفية النادي، أول ست فتحت المجال لستات كتير بعدها إن أحلامهم تتخطى السحاب، أول ست في مصر والعالم العربي وكمان في أفريقيا تقود طائرة لوحدها. وده كان سنة 1933، بعد ما تم تأسيس مدرسة مصر للطيران في 1932 والتحقت بها لطفية، وبقت تاني ست في العالم كله تحصل على إجازة الطيران لوحدها، بعد الأمريكية أميليا إير هارت.

آخر كلمة: ماتفوتوش قراءة: في يوم المرأة العالمي: 5 ستات خرجوا من تنميط المجتمع لهم

تعليقات
Loading...
Tweet
Share
Share
Pin