اتحولت السوشيال ميديا لمنصات مهمة في عرض فنون الأجيال الأصغر من الفنانين، وقدرت تثبت نفسها كمركز تواصل جاد وغني بين الفنانين وبين الجماهير العريضة، ولقت الجماهير فيها تنوع وثراء فني منحها رفاهية الاختيار والتدقيق والمقارنة بين الفنون المختلفة.
واحدة من فنانات الجيل الأصغر اللي لقت فرصتها للوصول لجمهور يقدر فنها؛ هي الرسامة والمصممة والفنانة التشكيلية المصرية نورا زيد، 25 سنة، والمقيمة حاليًا بين القاهرة ودبي.
عاشت زيد تلات سنين بس خلال مراهقتها في مصر، وبحكم شغل والدها، اضطرت تعيش حياتها كلها في الخارج، بتقول: “عشت معظم حياتي برا مصر وكنت بشوفها مرتين في السنة؛ زيارة في الصيف وزيارة تانية في الشتاء”.
ويمكن علشان كده اتحولت زوايا القاهرة ومشاهدها العادية جدًا، للثيمة الأساسية والغاية الجمالية في فن زيد، اللي بتقول: “بحب أوقف الزمن وأستشف لحظات معينة في حياة القاهرة، وأدي الناس فرصة تشوف اللحظات المسروقة دي من عمر المدينة الصاخبة”، وبتضيف: “بحب أقتبس لجمهوري لحظات من وسط الحركة والدوشة وأديهم الفرصة يقدروها في هدوء”.
بتستخدم زيد اللونين الأبيض والأسود بس في رسمها، وبتفسر ده: “بحب أستخدم الأبيض والأسود بس علشان تكون الصورة أبسط وفي نفس الوقت محتفظة بكامل تفاصيلها، ومش معنى كده إني مش هستخدم الألوان في المستقبل، ده احتمال وارد، لكن حاليًا رؤيتي دايمًا بالأبيض والأسود”.
بين الغاية الجمالية والقيمة التعبيرية تزدهر القاهرة في صور نورا زيد
القاهرة هي ناسها اللي بيعيشوا دوشتها وزحمتها وبتدب الحياة في شوراعها بخطاويهم، وعلشان كده بتقول زيد إنها بتحب تحكي قصص عن القاهرة يكون الإنسان العادي هو البطل فيها: “مش عايزة أفصل الإنسان عن المكان اللي برسمه”.
الجماليات في شغل زيد عنصر ضروري جدًا لنقل رؤيتها عن القاهرة كمدينة جميلة لجمهورها، وبتأكد: “ملامح الصورة في حد ذاتها هي الغاية الجمالية في الرسمة علشان ببساطة هي دي القاهرة، مدينة جميلة”.
السوشيال ميديا وتأثيرها على الجيل الجديد من الفنانين
بتوصف زيد نفسها بإنها شخصية انطوائية، وعلشان كده ساعدتها السوشيال ميديا تعرض شغلها من غير قلق، وساعدتها كمان تتواصل مع الجمهور ومع فنانين تانيين وتعمل صداقات وتلاقي فرص شغل.
وبتأكد إن للسوشيال ميديا جانب سلبي على الفنان: “أحيانًا كنت بقارن نفسي بفنانين تانيين، ورغم إن دي حاجة ممكن تكون كويسة، فالمقارنة أحيانًا بتجفف طاقة الشخص”، وبتضيف: “أحيانًا الواحد بينسى يركز في أهمية الشغل ويركز في عدد المتابعين والإعجابات، ويركز ازاي يعمل حاجة تعجب الناس أكتر من حاجة هو عايز يعملها”.
مصدر الإلهام وأشياء أخرى
بتحب زيد الرسم من وهي طفلة، وبتعتبره وسيلتها في التعبير. درست التصميم الجرافيكي Graphic Design في الجامعة، واشتغلت في وظيفة عادية من 9 لـ 5، لحد ما حققت لفنها وجود قوى على السوشيال ميديا واستقالت من شغلها واتفرغت للرسم والتصوير الديجيتال.
القاهرة هي الملهم الأساسي لشغلها، ولكن نفسها بعد ما تحقق التشبع الفني من جماليات القاهرة، تتوجه لرسم مدن تانية في مصر، زيّ الإسكندرية وبورسعيد وغيرها.
بيلهم زيد فنانين مصريين كتير منهم؛ عمرو ثابت، ومحمد مصطفى “بيكاسو”، اللي اشتغل مع مروان بابلو وكايروكي، واشتغل معاها على بروجكت نجيب محفوظ، وبتحب جدًا شغل مريم الرويني ويوسف صبري اللي بتوصفه بإنه سريالي ومميز جدًا، ومعجبة بشغل دينا محمد اللي عملت كوميكس شبيك لبيك، اللي بتوصفها زيد بإنها واحدة من أجمل كتب الكوميكس.