نجيب بالهادي: سباح تونسي قطع 155 كيلومتر من إيطاليا لتونس

اكتشف حبه للسباحة من وهو ظابط في الجيش التونسي، كان بيعوم أثناء التدريب لساعات وأيام من غير ما يحس بتعب عكس زملائه التانيين، فضل شغفه ملازمه طول حياته لحد ما قرر بعد ما طلع معاش إنه يرجع تاني يمارس وهوايته ويحقق نجاحات.. نجيب بالهادي، تونسي سبعيني، وفي الأيام اللي فاتت قطع 155 كيلو متر سباحة من جزيرة بانتالاريا في إيطاليا لشاطيء مدينة الحمامات في مدينة نابل التونسية من غير ما يقف ومن غير ما يستعمل بدلة واقية.. وبكده سجل إنجاز جديد يتضاف لرصيده من الأرقام القياسية العالمية.

نجيب بالهادي مش أول مرة يحقق إنجاز زيّ ده، لأ ده على مدار سنين تقاعده كان بيحقق أرقام ونتائج دخلته موسوعة جينيس، يعني عندك مثلًا في 1991 قطع مسافة 20 كيلو متر بين جزيرة قرنة ومدينة صفاقس، ونفس المسافة قطعها بين إنجلترا وفرنسا، ودخل ماراثون سباحة بمسافة 1400 كيلو متر على طول الساحل التونسي ووقتها فاز بلقب أفضل سباح في 2011، وفي 2021 دخل سباق المحيطات السبع، وده سباق بيتضمن عدة مسالك مختلفة من محيطات العالم.

غير ده، نجح إنه ياخد جائزة أطول مداومة في السباحة وده عن طريق إنه فضل داخل المياه 76 ساعة وتلاتين دقيقة، وده يعتبر أطول وقت بتسجله سباحة المداومة في التاريخ، وبسبب إنجازه ده قدر إنه يدخل موسوعة “غينيس” كصاحب أطول سباحة مداومة في التاريخ .. 3 أيام في المياه من غير ما يخرج منها وقطع فيها 120 كيلو متر.

رغم إنه أجرى مؤخرًا جراحة في القلب، على حسب تصريحات، بس ده مامنعوش إنه يكمل في اللي بيعمله، وغير السباحة هو عنده إنجازات تانية في سباق التحمل والقوة لإنه قدر قبل كد يسحب باخرة وزنها 1014 طن على مسافة 10 كيلو متر.

نجيب بالهادي اعتبر إن كل يوم بالنسبة له فرصة جديدة وعلشان كده وصل للي هو فيه وبنتكلم عنه دلوقتي.

أخر كلمة: ماتفوتوش قراءة: كل اللي محتاج تعرفه عن أزمة محمد صلاح مع ليفربول

تعليقات
Loading...
Tweet
Share
Share
Pin