ميعاد عرضه وكواليسه.. كل اللي محتاجين تعرفوه عن “كيرة والجن”

مفيش حد فينا تقريبًا أول ما سمع عن إن رواية 1919 للكاتب أحمد مراد هتتعمل فيلم “كيرة والجن” مفرحش واتحمس إنه يستنى يشوف الفيلم، وخصوصًا لما يكون أبطال الفيلم نجمين زيّ كريم عبد العزيز، وأحمد عز، اتنين نجوم ليهم أعمال سينمائية كبيرة وكلنا بنحبهم وبنحب نشوف أفلامهم، وده أول فيلم ليهم مع بعض، وكمان معاهم نجوم تانية زيّ هند صبري، وأحمد مالك، وسيد رجب وهدى المفتي، ولارا اسكندر، وضيوف شرف، وكمان بمشاركة بعض الممثلين الأجانب، والفيلم من إخراج مروان حامد، وإنتاج سينرجي فيلم.

وإمبارح نزل الكاتب أحمد مراد على صفحته على “تويتر” صورة من كواليس الفيلم، وكتب “استنونا مع أبطال المقاومة الشعبية في فيلم كيرة والجن عن رواية ١٩١٩”.

والفيلم اتوقف تصويره بسبب انتشار فيروس كورونا، ولكن طاقم العمل رجع استأنف التصوير في شهر يوليو اللي فات بعد ما قل انتشار الفيروس، وتم تصوير أكتر من 50% من الفيلم سواء ما بين القاهرة، والأقصر، والإسماعيلية، والاستديوهات في الفترة اللي فاتت، والمخرج مروان حامد قرر إنه يتم الانتهاء من تصوير العمل بالكامل خلال شهر ديسمبر الجاري.

وقال المنتج أحمد بدوى المدير العام لشركة سينرجى إن الشركة قررت طرح الفيلم في السينمات في صيف 2021، لو محصلش مستجدات في جائحة كورونا.

و”كيرة والجن” بيحكي عن واقع المجتمع المصري أثناء ثورة 1919، وبيكشف عن قصص حقيقية لمجموعة من أبطال المقاومة المصرية ضد الاحتلال الإنجليزي وقتها، ولغاية سنة 1924.

آخر كلمة: كلنا متحمسين نشوف الفيلم، ومستنينه بفارغ الصبر..

تعليقات
Loading...
Tweet
Share
Share
Pin