ساعات بتفصلنا عن موكب المومياوات الملكية، ودي كل حاجة محتاج تعرفها عن الطرق في اليوم ده

يوم السبت اللي جاي العالم هيشهد موكب المومياوات الملكية اللي فيه هيتم نقل مومياوات ملوك وملكات مصر القديمة من المتحف المصري في ميدان التحرير للمتحف القومي للحضارة المصرية في الفسطاط. وعشان الحدث الضخم ده قررت وزارة الداخلية المصرية تعمل مجموعة من التحويلات المرورية لتأمين موكب نقل 22 مومياء ملكية. وبناءً على ده، هيتم غلق الطرق الآتية من الساعة 6 م لحد الساعة 8:30 م.

  • غلق كل منافذ الدخول والخروج لميدان التحرير والمنافذ المؤدية ليه من كوبرى 6 أكتوبر وكوبرى 15 مايو.
  • غلق مطالع كوبرى 6 أكتوبر اللي متجهة لشارع النيل وغلق كوبرى الجلاء في الاتجاه اللي جاي من الجيزة.
  • غلق منطقة الكورنيش والشوارع الجانبية المؤدية ليه بدءً من كوبرى قصر النيل حتى منطقة الاحتفال.
  • وبرضه غلق كوبرى الجامعة وكوبرى عباس للي جاي من الجيزة.
  • وطريق (مصر – حلوان) في اتجاه ميدان أثر النبى.
  • غلق منازل كوبرى المنيب وطريق الأوتوستراد اللي بتوصل لميدان أثر النبى.
  • غلق محطة مترو السادات من الساعة 12 ظ لحد الساعة 9م.

في تمام الساعة 6 مساءً بعد غروب الشمس، هتبدأ الاحتفالية من قلب ميدان التحرير في وسط البلد بتحرك 22 مومياء و17 تابوت ملكي في عربات مخصصة لنقل جثامين ملوك مصر القديمة، ومزخرفة بالرموز الفرعونية وعليها اسم صاحب المومياء. هتنطلق العربات في موكب واحد لشارع كورنيش النيل ومنه لسور مجرى العيون مرورا بمنطقة الفسطاط لحد متحف الحضارة المصرية.

في متحف الحضارة المصرية، السيد الرئيس عبد الفتاح السيسي بصحبة مجموعة من كبار الشخصيات المحلية والإقليمية والدولية هيكونوا في إنتظار الموكب. الحدث هيتم تصويره على إيد أكتر من 400 قناة دولية لنقله لكل أنحاء العالم.

آخر كلمة: متفوتوش قراءة: كل اللي محتاج تعرفه عن موكب نقل المومياوات الملكية.

تعليقات
Loading...
Tweet
Share
Share
Pin