من محرم فؤاد لرامي وتامينو: الفن عرق يمد لسابع جد

في ذكرى ميلاد الفنان الراحل محرم فؤاد، بعد 20 سنة على رحيله.. حابين نفتكر محطات من حياته وفنه، اللي وقتها كان مختلف وسهل وبيوصل للناس، ولحد دلوقتي بيكمل المسيرة الفنية دي أحفاده، اللي بشكل ما قدروا يلاقوا طريقهم في الفن بطريقة تميّزهم، وليهم ستايل مختلف بيخلّيهم هما كمان يوصلوا للجمهور بسرعة.. تامينو أمير ورامي فؤاد، مغني ومخرج من عائلة أصلها فنية، ازاي الفن متأصل في عروق العائلة دي من محرم لتامينو ورامي؟

لو رجعنا بالزمن، وبصينا على أسلوب محرم فؤاد في الغناء وفي اختياره لأعماله الفنية، هتلاقي إن هو كان من أروش شباب جيله، زي تامينو دلوقتي، محرم زمان قدملنا أغاني بتتسمع لحد دلوقتي، وكمان كان البطل ابن البلد الرومانسي اللي مستعد يهد الدنيا علشان حبيبته، وعمل دور البطولة في القصة المشهورة “حسن ونعيمة” وغنالها رمش عينه اللي جرحني.

وأصل الإفيه العظيم المشهور في ميم “ماتعرفش شارع يا واحشني رد عليا ازيك سلامات” اللي بنستعمله دلوقتي في مواقف كتير، جاي من أغنية مشهورة لمحرم فؤاد، بتجمع بين الروشنة والرومانسية، في لحن عربي أصيل، فاكرينه لحد دلوقتي.

لو ركزت في الشخصية الفنية لمحرم فؤاد، هتلاقيه كان مميز في جيله، وكان متنوع وبيستخدم قوة صوته بأشكال كتير، وكمان جرب حظه في التمثيل.. وبمرور سنين، أحفاده دلوقتي ابتدوا مشوار مميز كمان.

تامينو أمير، اللي اتولد وعاش في بلجيكا، وابتدى مشواره الفني من هناك، بيقدم نوع مختلف من المزيكا، باستخدام قوة صوته اللي بيقدر كمان يستغله في طبقات مختلفة، حسب جو الأغنية، وفي كل الأحوال، بيقدر فعلًا يستغل ده بشكل كويس. تامينو قدم أول ألبوم كامل بعنوان “أمير” في 2018، بعد ما حققت أغنيته الأولى “حبيبي” نجاح كبير في 2017.

وعن اسمه، اللي لما تحاول تكتشف وتدوّر وراه هو اسمه تامينو ولا أمير؟ أو يعني إيه تامينو؟ لقينا في مقابلة سابقة لتامينو مع Vice إنه قال: “أمي أعطتني اسم “تامينو” ثم اختارت اسماً عربياً مع والدي وهو أمير. “تامينو” هو الاسم الذي يخاطبني به الجميع، أما “أمير” فهو خاصّ بي.”

أما عن اسم الألبوم، فقال: “أسميت الألبوم “أمير” لأن اللغة العربية تعني لي الكثير، وكان على اسم الألبوم أن يعني لي الكثير أيضاً. كما أن “أمير” باللغة العربية تعني الأمير الذي لم يختر أن يكون أميراً وأشعر بذات الشيء تجاه الموسيقى. فأنا لم أختر أن أكون موسيقياً ولكن ليس لدي خيار آخر.”

الجميل، إن بيشاركه الموهبة أخوه رامي، بس في الإخراج.. فلما تيجي تدوّر على أغاني تامينو علشان تسمعها، وحظك يبقى حلو وتلاقي الأغنية معمول لها فيديو، هتلاحظ إن الإخراج كمان هيلفت انتباهك، هتدوّر وراه وتلاقي إن المخرج هو رامي فؤاد. ولو عجبك صور الألبوم، هتلاقي إن هي كمان من تصوير رامي.

رامي وتامينو فؤاد
عن: veto

زي ما شوفنا في واحدة من أشهر أغاني تامينو، وهي “indigo night” اللي اتصور الفيديو الخاص بيها في مصر، وقدروا الأخوات إنهم يمزجوا حبهم بالموسيقى والإخراج في مصر، تامينو قال إن رامي بيقدر يعبّر عن الإلهام والمشاعر اللي تامينو حاسس بيها من غير حتى ما يقولها، وده اللي بيخلق بينهم كيميا بتظهر في الفيديوهات، اللي في الغالب بيبقى ليها قصة نابعة من الأغنية، وبيقدر رامي يجسدها في عمل مرئي.

آخر كلمة: ماتفوتوش قراءة: رثاء الكواكب: وقف إصدار المجلة اللي قدمت لنا 90 سنة فن وسينما.

تعليقات
Loading...
Tweet
Share
Share
Pin