من جاردن سيتي لإمبابة، دي أفضل عربيات الفول في القاهرة الكبرى

لو إنت من سكان القاهرة فلازم تكون عارف إن الفول هو من أكتر وجبات الإفطار الشائعة عند المصريين، ولحسن حظنا، عربيات الفول الشهيّ اللي بتوفر وقت تحضير الفطار والإنتظار منتشرة في كل مكان في العاصمة. إنت مش محتاج تكون عايش في المنطقة اللي فيها عربية الفول عشان تكون عارفها لإن كل عربيات الفول دي مشهورة بين أهل القاهرة.

ادفع أقل ما يمكن لوجبة مصرية أصيلة صحية، وفي نفس الوقت هتستمتع بصحبة الناس اللي بياكلوا جمبك مع عربيات الفول التالية.

عم محروس

أشهر عربية فول في جاردن سيتي هي عربية عم محروس اللي زباينه مش بس مصريين. أجانب كتير بياكلوا من عنده دايماً وده وبالرغم من إن أسعاره ممكن تكون أغلى من باقي عربيات الفول إلا إن كل واحد بياكل عنده بيشهد إن ثمنه فيه.

عم عطية

في زاوية صغيرة بجانب جراند مول المعادي تقع عربية فول عم عطية اللي أي حد بياكل من عنده لازم يكون سمعه وهو بيقول “فول بالأونيون (بالبصل) .. واحد فول بالأونيون هنا”.

سعد الحرامي

الفنان الراحل فريد شوقي هو من أطلق عليه لقب الحرامي وده بعد ما عم سعد فاز عليه في دور دومينو. عربية سعد الحرامي موجودة في وسط البلد من أكثر من 30 سنة، وسندوتشاته الشهية هتملى معدتك أكيد.

كتير من الفنانين المصريين زي خالد الصاوي وأشرف عبدالباقي بيروحوا ياكلوا من عنده، وعربيته هي أول عربية فول في مصر يكون ليها صفحة على الفيسبوك.

عبده دولار

الناس بتروح لعين شمس من مختلف مناطق القاهرة عشان بس ياكلوا فول من عند عبده دولار، وده على الرغم من كونه البائع الوحيد الذي يعارض مقولة “الزبون دائماً على حق”.

سيد ومبي

بأسعاره المعقولة والفول عالي الجودة، سيد ومبي هو صاحب أشهر عربية فول في إمبابة. لكن لو هتروح تتسحر عنده في رمضان لازم تكون مستعد للطابور الطويل اللي هيكون في إنتظارك لإن دي مش هتكون بس وجبة دي هتكون تجربة كاملة.

آخر كلمة: جربت منهم إيه قبل كده؟

تعليقات
Loading...
Tweet
Share
Share
Pin