من الهيشان والهبوط: ازاي تحافظ على شعرك الكيرلي أثناء النوم

بطبيعتنا، نسبة كبيرة من المصريين شعرهم كيرلي، وطبعًا بنواجه مشكلة كبيرة في الروتين بتاعه علشان نحافظ عليه من الهيشان والتقصف، علشان يبقى شكله صحي وطبيعي، وأكتر وقت بيكون فيه مشكلة ومابنعرفش نحافظ على شعرنا ازاي هو وقت النوم، يعني تبقى مستحمي وعامل روتين تعبت فيه قد كده وتنام تصحى تلاقي حاجة تانية خالص، علشان كده في طرق بتساعد في المحافظة على الكيرلز بشكل حلو وdefined في وقت النوم.

مخدة ستان

النصيحة الذهبية الأولى لروتين الشعر الكيرلي في فترة النوم، إنك تربط شعرك بإيشارب ستان أو تنام على مخدة ستان، أو حتى تجيب كيس مخدة من قماش الستان، علشان القماش القطن بيمتص الزيوت الطبيعية من شعرك، وأي منتجات تانية بتعملها في روتينك، على عكس الستان والحرير، علشان كده الستان هيساعد في الحفاظ على الشعر من التكسير.

تسريحة الأناناسة

كمان بعد ما بقت موضة ومش بنتكسف ننزل بيها في الشارع، التسريحة دي هي الحل الأمثل علشان تحافظ على الكيرلز من التكسير، وبتتعمل بطريقة سهلة جدًا. وبعد ما بنعملها، ممكن نربط إيشارب ستان لنتيجة أحسن.

الضفاير

عن: Fustany

غير إننا متعودين عليها من أمهاتنا من واحنا أطفال، الضفاير حل مناسب للحفاظ على الكيرلز بتموجات مظبوطة وهتحافظ عليه من الهيشان، وممكن لنتيجة أحسن نعمل الضفاير بعد غسل الشعر وعمل الروتين كله والستايلينج.

كحكة عشوائية

عن: هي

لو شعرك أفصر من إنه يتعمل أناناسة، فممكن الكحكة العادية تقضي الغرض، بس نخلي بالنا إنها تكون مفكوكة مش مشدودة علشان ماتبوظش الكيرلز.

البعد عن ربطات الشعر المطاط

عن: DHgata

من الحاجات اللي بتبوظ الكيرلز هي التوك المطاطية العادية، علشان كده بينصح باستخدام توك ستان وكمان مانربطهاش مشدودة، علشان الشعر مايتكسرش.

ربط الشعر قبل النوم

من الحاجات اللي بتبوظ الشعر الكيرلي إننا ننام وهو مش ملموم، هنصحى نلاقيه هايش ومتكسر بطريقة تخوف، علشان كده لازم نربطه قبل النوم علشان نحافظ على الكيرلز من التقصف والهيشان.

آخر كلمة: ماتفوتوش قراءة: ليه مشوار الكوافير ممكن يبقى أحلى أو أوحش حاجة في يومك؟

تعليقات
Loading...
Tweet
Share
Share
Pin