من البسمولة للمتدلعة: اختراعات جديدة للحلويات الشرقية في رمضان

كل سنة بنحتفل برمضان بالحلويات اللي تعتبر أساسيات فيه، ومنهم ثوابت ماحدش ينفع ييجي جنبهم، بس بنشوف كل سنة اختراعات جديدة في الحلويات، وغالبًا اللي فتح الطريق ده من بدايته كان اختراع الكنافة بالمانجا، لحد ما وصلنا لدلوقتي، في طرق كتير جدًا للحلويات الشرقية غير الطرق اللي اتعودنا عليها من زمان، وبميكسات كمان بين المكونات الأساسية للحلويات، وبقى عندنا البسمولة والمتدلعة، تعالوا نشوف إيه دول وعبارة عن إيه وإيه أحدث الاختراعات كمان.

البسمولة بعد تخمين كتير وأسئلة، اتضح إنها ميكس بسبوسة ومعمول، وبتتزين بالشوكولاتة أو اللوتس أو الكراميل، وبقى ليها جمهور كبير خصوصًا السنة دي، يمكن علشان الناس زهقت من الشكل التقليدي للحلويات في رمضان، وإننا عندنا شهر كامل محتاجين ننوع فيه، ويمكن كمان علشان بنحب الاختراعات والميكسات.

عن: behance

وفي كمان المتدلعة، اللي اسمها مخلينا نسأل هي عبارة عن إيه وليه سموها كده، المتدلعة دي عبارة عن كوكتيل، طبقة من الكنافة والبسبوسة وطبقة من كريم شانتيه، والكراميل والمكسرات، وبتختلف شوية على حسب التاتش بتاع كل مكان بيبيعها، ودي ظهرت من فترة لكنها تعتبر لسه مش منتشرة وفي ناس أول مرة تسمع عنها، وتعتبر أكتر مكان مشهورة فيه هو طنطا.

وفي كمان حاجة تعتبر غريبة، وهي البسبوسة بالكريم كراميل، مش صوص الكراميل نفسه للتزيين لأ، الكريم كراميل نفسه، ميكس غريب لكن لذيذ.

عن: Youtube

آخر كلمة: جربوا الحلويات وقولوا لنا رأيكم في الكومنتات.. وماتفوتوش قراءة: نصايح بسيطة علشان تكون في أمان في رمضان لو بتعاني من أمراض

تعليقات
Loading...
Tweet
Share
Share
Pin