منع مروان بابلو من الغناء بسبب ابتهال ديني: إيه المشاكل اللي حصلت في الحفلة؟

يوم الجمعة كانت حفلة مروان بابلو وشب جديد اللي كان مستنيها كتير من الناس خصوصًا إنها كانت أول حفلة لبابلو بعد ما أعلن اعتزاله من سنتين. ولكن الحفلة حصل فيها أكتر من مشكلة، وأخرهم أزمة كبيرة خلت نقابة المهن الموسيقية تاخد إجراء منع بابلو من الغنا وتحذير التعامل معاه بسبب الاستهانة بابتهال ديني. فإيه اللي حصل بالظبط؟

المشاكل بدأت من قبل ما الحفلة تبتدي عند البوابات. ناس كتير اشتكت من سوء تنظيم الحفلة وإن في ناس دفعت تذاكر بس ماقدرتش تدخل وناس ماكانش معاها تذاكر ودخلت. وبعدين حصل مشاكل جوا الحفلة لما أكتر من شخص قال إنه اتعرض للتحرش من قبل الشباب اللي جوا الحفلة وفي ظل التكدس الكبير. أما المشكلة الكبيرة اللي خلت مروان بابلو يتمنع من الغنا، كانت بسبب حاجة عملها شب جديد.

مغني الراب الفلسطيني شب جديد ظهر على المسرح وقام بتغيير كلمات من ابتهال ديني شهير على سبيل الهزار، ولكن رد فعل كتير من الناس كان غاضب ورافض تمامًا للي حصل. وده كان سبب إن النقابة تصدر قرار المنع بشأن مروان بابلو، بالرغم من إن شب جديد هو اللي قال الكلام.

وفسر المستشار القانوني لنقابة المهن الموسيقية، إن العقوبة وقعت على بابلو لإنها حفلته هو، وإنه هو اللي أخد ترخيص إحياء الحفلة (لإنه مش عضو في النقابة وبياخد التراخيص يوم بيوم)، وبالتالي كل اللي يحصل في الحفلة يخصه. وإنه كان من المفترض إنه يوقف شب جديد أو حتى يعتذر عن اللي قاله. “نحن لا نعرفه ولكننا نعرف مروان بابلو الذي حصل على الترخيص لإقامة الحفل”، قال المستشار عن سبب عدم توقيع عقوبة على شب جديد.

وأكد المستشار إن ابتهالات النقشبندي لها مكانة خاصة عند المصريين وإن مش مسموح لحد المساس بيه، وده اللي خلاهم ياخدوا قرار حازم بالشكل ده، وأكد كمان إن مروان بابلو ماينفعش حتى إنه يقدم تظلم على القرار لإنه مش عضو في النقابة. أما عن موقف شب جديد، فاعتذر عن اللي حصل وقال إنه ماكانش يعرف إن الموضوع هيكون مسيء للمصريين وإنه أساء التقدير لكن نيته كانت صافية. وكمان اعتذر مروان بابلو عن أي مشكلة حصلت خلال الحفلة.

آخر كلمة: ماتفوتوش قراءة: “نقابة المهن الموسيقية تمنع مروان موسى وعفروتو وبعض مطربي المهرجانات من الغناء” …

تعليقات
Loading...
Tweet
Share
Share
Pin