اتحداك إنك لو فتحت السوشيال ميديا دلوقتي، هتلاقي تقريبًا كل البوستات بتتكلم عن رمضان، فالناس كلها في الوقت ده من السنة بيتحولو لنقاد بيراقبوا كل حاجة بحذر وبيحللوها.. فياما هتلاقي كلام إيجابي عن مسلسل أو ناس تانية تصيدت أخطاء له، واللي بيهاجموا إعلان وقدامهم ناس الناحية التانية بيدافعوا عنه، واللي شغال يعمل ميمز على كل وأي حاجة.. واللي تايهيين في النص! ولإن الحاجات فعلًا كتير جدًا وصعب إنك تـ catch up، هنجمعلك في المقالة دي باختصار كل اللي شوفناه على التلفزيون ومن بعدها على السوشيال ميديا، في أول يوم من رمضان.
دينا الشربيني وشيرين رضا فعلًا طلعوا بيعملوا إعلان
فاكرين الـ stories اللي شوفناها لدينا الشربيني وشيرين رضا والناس قعدت تقول إن ده شكله إعلان لحاجة في رمضان، وناس تانية قعدت تعمل ميمز ليها علاقة بعمرو دياب؟ فعلًا زيّ ما الناس توقعت طلع إن دول كانوا زيّ “teasers” لإعلان ZED الجديد.. ولكن الناس ماتوقعتش إن الإعلان هيكون مبهر بالشكل ده من حيث الأغنية، ونجوم الفن والكرة الكبار اللي شاركوا فيه، وكمان الـ execution بتاعه!
لعبة نيوتن قلب الدنيا من أول يوم
في كده مسلسلات بيبقى معروف من أول يوم عرض إنها هيحققوا نجاح ساحق. وأول المسلسلات دي السنة دي هو لعبة نيوتن اللي تقريبًا من الأعمال القليلة اللي معظم الناس أجمعت عليها، لدرجة إن هاشتاج باسم المسلسل بقى تريندنج على موقع تويتر، لإن ببساطة الناس معجبة بالمسلسل وبعنصر التشويق اللي كلنا شوفناها من الحلقات الأولى!
إعلان شريهان اختلف عليه الناس
ممكن تستغربوا من النقطة دي، علشان كان متوقع إن الناس كلها تجمع عليه، خصوصًا بعد الأزياء والقصة المؤثرة، ورجوع شريهان نفسه كفاية، اللي شوفناهم في الإعلان. بس واضح إن مفيش حاجة في الدنيا الناس ممكن تجمع عليها.. ولا حتى شريهان! فبالرغم إن معظم الناس حبوا الإعلان، في شوية تانيين شافوا إن طريقة تنفيذ فكرة الإعلان كانت عشوائية إلى حد ما، وده اللي خلى البعض مايفهمش أوي فكرة الإعلان، بس ده مالوش علاقة طبعًا بحب الناس ليها!
برنامج رامز جلال بيواجه انتقاد من نوع مختلف
طبعًا انتوا فاكرين إن إحنا هنقول زيّ كل سنة إن الناس متضايقة من برنامج رامز علشان العنف والترهيب والتنمر اللفظي اللي بيعمله رامز وهو بيعلق خلال الحلقة على ضيوف البرنامج.. لكن باستثناء أخر نقطة، الباقي كله اتغير. هل فكرتوا إن في يوم من الأيام إن الناس هتقول إن برنامج رامز مايعتبرش مقلب حتى من كتر ما هو مش مخيف؟ الصراحة ولا إحنا.. بس أهو ده اللي حصل.. الناس شافت إن ده برنامج جايب ناس خايفيين من الملاهي مش أكتر من كده.
مسلسل غادة عبد الرازق بين التشكيك في الاهتمام بالتفاصيل، وانتظار plot twist
غادة عبد الرازق من الفنانات اللي بتختار بعناية شديدة الأعمال اللي بتقدمها، ومعروف إنها بتركز في التفاصيل وبتعمل كل حاجة ممكنة (زيّ الاستغناء عن الميك أب) علشان يبقى في مصداقية للشخصية اللي بتلعبها.. لكن المرة دي المشاهدين خدوا بالهم من بعض الغلطات اللي بتتعارض مع كل اللي احنا قولنا إننا متعودين عليه من أعمال غادة عبد الرازق. فالناس اتكلمت عن إن إزاي هي حاطة كل المكياج ده وهي المفروض بياعة لحمة، وإن كمان اللوكيشن شكله منمق نسبيًا عن الطبيعي، وكمان فكرة وجود cast من اللبنانيين (لإن المسلسل اتصور في لبنان) اللي المفروض بيأدوا دور ناس عادية ماشية في حارة شعبية مصرية، خلى الموضوع يفقد مصداقيته أكتر.
لكن في ناس تانية قالت إن من المتوقع إن شخصية غادة تكون غنية فعلًا ومزروعة في المكان ده علشان بتدور على حاجة لسه هنكتشفها في الأحداث، وعلشان كده المكياج واللبس كان مقصود.. إيه رأيكم؟ نستنى شوية قبل ما نحكم؟
إعلان يونيون آير خلانا عايزين نرتبط مش نشتري تكييف
إعلان يونيون آير اتقال عليه كلام كتير، في اللي قال إنه نسخة مصغرة من فيلم هيبتا (علشان فيه قصص حب لأجيال مختلفة) وأغلبية الناس التانية علقت على فكرة إن قصص الحب اللي شوفناها، وكمان مع صوت شيرين في الأغنية، عمل shift بسيط كده.. بدل ما بقوا متشجعين يشتروا تكييف، بقوا متشجعين يرتبطوا ويعملوا عيلة!
انتقادات وجهت لمسلسل خلي بالك من زيزي
المسلسل اللي من بطولة أمينة خليل واجه كتير من الانتقادات أبرزهم المشهد اللي لما قالها إنه مش عايز يستمر في الزواج منها، اعتدت عليه الضرب وكسرت إزاز العربية. وده اللي شافوا الناس glamorizing abuse طالما طالع من الست.. ومفيش أي نوع من أنواع العنف مبرر أو مقبول سواء من الراجل أو الست، ومش هي دي القوة.
برنامج 5 نجوم اللي محدش سمع عنه غير بعد انتشار ميم
هل كنتوا تعرفوا إن في برنامج مقالب بيتعرض في رمضان اسمه 5 نجوم؟ الحقيقة ولا إحنا، بس apparently ده برنامج مقالب بيقدمه نجوم كبار زيّ غادة عادل ومصطفى قمر وكريم فهمي ومحمد الشرنوبي ونور.. ومحدش كان واخد باله من البرنامج لحد ما الميم بتاعت هيفاء وهبي بقت منتشرة في كل حتة على السوشيال ميديا.