قرر وكيل وزارة التربية والتعليم بمحافظة الدقهلية إحالة 5 معلمين من إدارة غرب المنصورة للنيابة الإدارية بعد ما ظهر فيديو وصلة رقص لبعض المعلمين على مركب نيلية في رحلة نظمتها نقابة المعلمين في غرب المنصورة. والفيديو انتشر على السوشيال ميديا بقوة تحت اسم “معلمة المنصورة”.
تلقى وكيل وزارة التربية والتعليم في الدقهلية، شكوى من بعض المعلمين، وجات مع الشكوى إسطوانة فيها عدد من مقاطع الفيديو، لمجموعة مدرسين في وصلة رقص مع واحدة من المعلمات اللي بتشتغل بنظام التطوع في مدرسة خالد بن الوليد الابتدائية اللي تتبع إدارة غرب المنصورة.
كشفت “معلمة المنصورة” عن تفاصيل اللي حصل خلال بث مباشر لها مع صحيفة الوطن، وقالت المعلمة آية يوسف وهي متأثرة: “منه لله اللي صورني، خرب بيتي وجاب لي اكتئاب، وجاب لعيالي اكتئاب.. كل ما حد من عيالي يشوف الفيديو يقولوا لي في إيه يا ماما، اتسبب الفيديو في مشاكل ليا وفي بيتي وأهلي وأسرتي، ليه حد يعمل حاجة زيّ كده؟”.
ووضحت رد فعل زوجها بعد انتشار مقطع الفيديو: “أكيد في مشكلة بيني وبينه حصلت.. بس الدنيا بتروق شوية شوية، وهو أكيد هيدعمني.. أنا غلطانة إني وثقت في الناس اللي معايا.. ماكنتش أعرف إني بتصور، ولو كنت أعرف إن في حد بيصور أكيد كنت رفضت.. الموضوع كان مع زملاء في حفلة نيلية، وكان ترفيه وبنفك عن الكبت.. أنا باخد 24 حصة في الأسبوع ومكبوتة جدًا.. يعني هو حرام الواحد يفك عن نفسه شوية؟”
وكملت: “بقول لأولياء الأمور اسألوا ولادكم أنا كنت بشرح لهم ازاي، وكنت بتعامل معاهم ازاي.. ده حتى وأنا في الحفلة كان لبسي عادي جدًا.. مالبستش حاجة تعمل ضجة يعني دي رحلة في وسط الناس ووسط أهلي، وأنا بتواجد مع زملائي في العمل أكتر من وجودي مع أهلي في البيت.. يعني بخرج الساعة 6 من بيتي وبروح على المدرسة عشان نفطر وبعدين كل واحد يروح حصصه وبعدين نتكلم شوية”.
ولما اتكلمت عن مصور مقطع الفيديو، قالت آية: “عيب اللي عمل كده فيا.. أنا هسيبه للقضاء هو اللي يحاكمه عشان هو شوه سمعتي وسمعة عيالي.. هعمل فيه كتير.. بس أعرفه بس، وأنا مانعة تدخل أي حد معايا في الموضوع ده عشان الاكتئاب اللي عندي، وأنا أصريت أطلع معاكم بس عشان أدافع عن نفسي رغم رفض جوزي، وطلعت أقول محدش حولني للتحقيق، وأنا اللي ماضية على التنازل”.