في الفترة الأخيرة بقى في اهتمام ملحوظ وتركيز على قضايا المرأة والدفاع عن أي ست ممكن تكون بتعاني من حاجة بس مش عارفة تتكلم أو تطالب بحقها، فبتيجي حملات التوعية تعمل ده، علشان تكون صوت الستات اللي مش عارفة تتكلم، وتحاول تجيبلهم حقوقهم كمان. وفي حملة جديدة، “ميدفيست” بتركز على قضايا العنف ضد المرأة من ناحية الصحة، وده بالتعاون مع المجلس القومي للمرأة وصندوق الأمم المتحدة للسكان والوكالة الإيطالية للتنمية والتعاون.
ومعظم الحملات بتبقى مركزه على مكافحة قضية التحرش ضد المرأة، علشان ده من أكبر المشاكل اللي بتواجه كل ست في المجتمع، لكن حملة “مش عادي” بتركز أكتر على جوانب العنف المختلفة، من أول العنف اللفظي (اللي كتير مش بيصنفوا كنوع من أنواع العنف) لحد العنف الاجتماعي والجسدي.
وفي الحملة دي بينشروا الوعي بأنواع العنف اللي مش معروفة في المجتمع، وفكرة إن مفيش وعي دي هي اللي بتخلي المعتديين يتمادوا في العنف، لإنهم بيلاقوا الضحية ضعيفة، وأحيانًا مش مدركة إن ده أصلًا بيصنف عنف ممكن ترفضه وتقف قصاده.
والحملة بتستخدم لغة الأفلام والدراما كوسيلة علشان تطرح الأسئلة، فهيتعمل أفلام أونلاين بتناقش قضية تعنيف المرأة بمختلف الطرق، وبعدها بيتم نقاش بين صناع الفيلم مع أطباء متخصصين حوالين فكرة الأفلام، وبيناقشوا إن كانت فعلًا نوع من أنواع العنف ولا لأ، وكمان بيبحثوا أكتر في ردود أفعال الستات، لما بيتعرضوا للعنف بكل أشكاله، وبعض الفنانين تضامنوا مع هدف الحملة، وانضموا ليها، ونشروا صورة ليهم لابسين كمامة مكتوب عليها “مش عادي”، وبيعبروا عن رأيهم الشخصي في القضية.
مريم الخشت
شاركت الفنانة مريم الخشت بصورة لها للتضامن مع الحملة، وقالت “لأ مش عادي. أنا من البنات اللي في يوم اتقالها “عادي”. بس من جوايا كنت عارفة إنه لأ مش عادي.. و كنت صح. وإنتِ كمان صح.. مش عادي !!، وحاولت الخشت إنها تنقي كلام علشان تقوي موقف الستات، وكسر وصمة العار اللي بيفرضها المجتمع على أي حد بيفكر يشتكي ويتكلم عن مشكلته.
ليلى علوي
وكمان الفنانة ليلى علوي دعت أي واحدة بتتعرض للعنف إنها متسكتش عن حقها، لإن توقف العنف بيبدأ من عند الست لما تقرر إنها متسكتش، لإن أي عنف بتتعرضله الست بيبقى ليه تأثيره النفسي والجسدي عليها، واللي بيكون أكبر مما نتخيل، وممكن لو ما اتكلمتش الست ولا اتعالجت منه إنه يفضل مأثر عليها بعد كده.
هاني عادل
ووجه هاني عادل كلامه أكتر للرجالة، وقال “مش عادي إنك تقلل من قيمة الست اللي معاك علشان تحس إن عندك قيمة”.. وده بيركز على المبررات اللي ممكن يقولها الزوج مثلًا علشان يقلل من زوجته، واللي بيفتكر إنه بكده بيعلي من نفسه.