بما إن شهر رمضان المبارك بيبقى حوالي 30 يوم، فاللي إحنا متعودين عليه هو إن المسلسلات المشاركة في السباق الرمضاني يكون عدد حلقاتها نفس الرقم، علشان تفضل مصاحبانا وموانسانا طول الشهر بأحداثها وأبطالها.. ولكن زيّ أي حاجة في الدنيا بتطور بمرور الوقت، موضوع عدد الحلقات ده مفهومه اختلف، وبدأنا نشوف مسلسلات من 15 حلقة بس، سواء لإن القصة صغيرة وأصحاب العمل مابيبقوش حابين يمطوا في الأحداث علشان مايصبوش الناس بالملل، أو حتى لإن أوقات الإنتاج بيبقى ضخم جدًا، فبيلجأوا للshort versions علشان يقدروا يقدموا محتوى مميز.. وكمان من ضمن الأسباب، هو تقديم قصص قصيرة مختلفة واللي مابتحتاجش أكتر من 15 حلقة علشان الرسالة توصل للجمهور. فمن غير ما نطول عليكم، دول 4 مسلسلات هيشاركوا في رمضان اللي جاي بـ 15 حلقة بس..
مسلسل بين السما والأرض
المسلسل مأخوذ عن قصة الكاتب العظيم نجيب محفوظ اللي بتحمل نفس الاسم، ولكن وضح مخرج العمل محمد العدل إن المسلسل مقتبس من القصة ولكن الشخصيات هتكون مختلفة. وهيشارك في العمل هاني سلامة ودرة ويسرا اللوزي وسوسن بدر ونجلاء بدر، وغيرهم من الفنانين الكبار. وبعد الكيميا العليا بين هاني سلامة ودرة اللي شوفناها في مسلسل نصيبي وقسمتك، وكمان قدرتهم وبجدارة على تقديم قصص قصيرة خلال المسلسل، فإحنا متشوقين من دلوقتي إن إحنا نشوفهم في عمل جديد مع بعض!
مسلسل كوفيد 25
أكدت زوجة يوسف الشريف ومؤلفة العمل إنجي علاء، إن المسلسل هيتكون من 15 حلقة بس وده بسبب التحضير الكبير اللي كان محتاج مجهود مضاعف من حيث التحضيرات وكمان الميزانية الإنتاجية المطلوبة علشان يطلع المسلسل بأحسن شكل، فعلشان كده هيكتفوا بعرض 15 حلقة بس.. المسلسل هيبقى من بطولة يوسف الشريف، وأحمد صلاح حسني وآيتن عامر وميرنا نور الدين.
مسلسل عالم موازي
مسلسل المدينة اللي برضه هيتكون من 15 حلقة هيكون من بطولة دنيا سمير غانم وشيماء سيف وعمرو وهبة ودلال عبدالعزيز، وهيكون من تأليف وإخراج هشام جمال. وبما إن إحنا شوفنا شيماء سيف وعمرو وهبة ودلال عبدالعزيز مع هشام جمال بيحققوا نجاح كبير إزاي مع بعض زيّ ما شوفنا من خلال آخر تجربة في مسلسل “في بيتنا روبوت”، فالحاجة الوحيدة اللي ممكن تزعلنا إن المسلسل ده هيكون 15 حلقة بس، هو إن إحنا هنبقى عايزين نشوف منهم أكتر!
مسلسل أحسن أب
في عمل كوميدي، هنشوف علي ربيع بطل لمسلسل عدد حلقاته 15، من تأليف محمد محمدي وأحمد محيي ومن إخراج معتز التوني.. فهل متشوقين تتفرجوا على المسلسل؟