مفيش مكان شغل سواء في الوسط الفني أو غيره، بيخلى من التحديات والمشاكل، بس علشان الفنانين شخصيات عامة ومعروفة، فهما للأسف بيكونوا أول ناس نسمع عنهم وقت لما يكون في خلافات.. وإمبارح حصلت مشكلة كبيرة بين الفنانة رحاب الجمل والفنان باسم سمرة، اللي أدى في النهاية إنهم اتوقفوا عن التمثيل لحد ما تنتهي التحقيقات.. فإيه اللي حصل بالظبط خلى الأمور تتصاعد بالشكل ده؟
المشكلة بدأت لما رحاب الجمل كتبت بوست على الفيسبوك اتكلمت على أحد الممثلين إنه بيجي بروفات فيلم الديك العياط وهو سكران، ومش في وعيه وكان مصمم يشرب حشيش في اللوكيشن، وإن سب زملائه الممثلين والممثلات في الفيلم، وحصل سب وقذف من ناحيته للممثلين المتواجدين في اللوكيشن، اللي وصل لحد ضرب أحد الممثلين.. وده اللي مش مقبول بالنسبة لرحاب، فبلغت النائب العام علشان ترجع حقها وحق زملائها، وأكدت إن كل كلامها ده ممكن يُثبت من خلال تسجيل الكاميرات.. وبعد شوية وضحت رحاب كلامها أكتر وقالت إنها تقصد الفنان باسم سمرة بكلامها ولكنها حذفت البوست، واكتفت بكتابة تعليق تاني بتشكر فيه نقابة المهن التمثيلية وقالت “شكرًا أشرف زكي لاهتمامك وحرصك على مصلحة الفن والفنانين” وقالت كمان إنها واثقة في نقابتها إنها هتحقق في الموضوع.. ولكن كتير شاف إن الكلام اللي استخدمته رحاب في وصف زميلها كان مسيء وحاد.
أما رد باسم سمرة، في الأول بنشره على الفيسبوك لصورة ليه معلق عليها “الكلام مش بفلوس يا جملاوي” وصرح بعدها إن كل الكلام اللي اتقال عليه “عار تمامًا من الصحة وإنها بتختلق وقائع مش حقيقية”، وإنه احترامًا لنقابة المهن التمثيلية، هيتقدم ببلاغ وشكوى ضد رحاب لنقيب المهن التمثيلية لتشهيرها بيه، وطلع كمان في مكالمة هاتفية بأحد البرامج وعلق على الموضوع كله.. وقال إن رحاب عملت كده، لمجرد اعتقادها إنه كان ممكن يمشيها من العمل، بسبب إن رحاب كانت عايزة تسافر بدري وهو طلب منها تأجل سفرها لغاية ما يخلصوا بعض المشاهد اللي بينهم ولكنها ماكنتش هتقدر تعمل ده.. وبدأ الحوار ياخد منعطف حاد لما قال باسم “أنا أعرف أخد حقي بدراعي”..
وبعد تصاعد المشاكل بين الطرفين، تدخل نقيب المهن التمثيلية الدكتور أشرف زكي، وقال إن ماينفعش إن الفنانين والفنانات يهاجموا بعض ويتجاوزوا على السوشيال ميديا قدام الناس، وإن لو حد غلط فيك، المفروض تلجأ أولًا للنقابة وهي مسئولة ترجعلك حقك في خلال 24 ساعة.. وكمان إنه “بيوجه تحذير شديد اللهجة” لأي فنان يستخدم السوشيال ميديا لمهاجمة زملائه، إنه هيتوقف فورًا، لإنه مش هيسمح للنجوم إنهم يبقوا مادة يستخدمها أي حد.. وفعلًا النقابة وقفت رحاب الجمل وباسم سمرة من مزاولة المهنة، لحد ما ينتهى التحقيق في الواقعة.
وأضاف الدكتور أشرف زكي إنه هيتم التحقيق في الواقعة خلال 48 ساعة، وإن اللي حصل بيعتبر إهانة للوسط الفني كله وده اللي خلاه يلجأ لقرار إيقافهم هما الاتنين عن مزاولة المهنة داخل وخارج مصر، لإنهم مالتزموش بالصمت خلال الموضوع لحد ما النقابة تتدخل وتحل المشكلة.