بعد إعلان إصابة شريف مدكور، ازاي نفرق بين كورونا و فيروس A؟

بعد ما اتعرض الإعلامي شريف مدكور لأزمة صحية في الأيام اللي فاتت، طلع واتكلم عنها وحذر من الخلط اللي ممكن يحصل بين أعراض فيروس كورونا أو أي مرض تاني، وقال إنه وقع في المشكلة دي لما فضل أسبوعين بيحس بأعراض كورونا، من تكسير في الجسم وارتفاع في الحرارة وصداع شديد وفقدان الشهية، ولما كان بيحلل كانت بتطلع النتيجة سلبية، وقعد فترة كده لحد ما عمل فحوصات للكبد ولقى إن الكبد مش قادر يقوم بوظايفه، واكتشف بعدها إنها ماكانتش كورونا وطلع التهاب الكبد الوبائي A، والخلط اللي حصل ده كان بسبب الأعراض المشتركة بينهم، وعلشان كمان معروف إن كورونا قادرة إنها تؤثر على الكبد.

والحادثة دي فتحت لنا الكلام عن ازاى نفرق بين كورونا وأي مرض تاني وازاى نقدر نحمي نفسنا من عدوى الكبد الوبائي لإنه خطورته ماتقلش أبداً عن أي فيروس أو مرض تاني.

إيه هو التهاب الكبد الوبائي وازاي نحمي نفسنا منه؟

فيروس A الدكاترة بيعتبروه مايقلش خطورة عن أي مرض تاني، لإنه بيؤثر في الكبد وبيخليها ماتشتغلش بشكل طبيعي وممكن في الحالات الحرجة يحصل فشل في الكبد كله، وخصوصًا لو كان المصاب كبير في السن، يمكن تكون أعراض إصابته شبه أعراض الفيروس، بس في علامة مميزة بتظهر على المصابين بيه، وهي حالة الخمول الغير طبيعية لإن الشخص ممكن ينام بسببه يوم كامل لإن الكبد بيبقى هو كمان في حالة خمول وده اللي حصل مع شريف مدكور فعلاً. ومن ضمن العلامات برضه هو إن مريض الكبد بيبقى لون “حدقة” العين مايل للاصفرار ولون البول بيبقى شبه لون الشاي. والأعراض بتترواح بين متوسطة وخفيفة وحادة ولحد دلوقتي مالوش علاج، هو المفروض إن له فترة حضانة وممكن بعدها يروح لوحده، بس الدكاترة بتنصح إن في خلال الفترة دي المريض مايخُدش أدوية مالهاش لازمة، علشان هتؤثر بشكل سلبي على نشاط الكبد.

طب ازاي نحمي نفسنا منه؟ الفيروس ده معدي وممكن ينتقل لو استخدمت حاجات الشخص المصاب بيه، علشان كده مهم إنه يبقى عندنا أدواتنا الشخصية اللي ماحدش بيستخدمها غيرنا، ونتجنب على قد ما نقدر الأكل الجاهز خصوصًا لو شاكين في الطريقة اللي بيتعمل بيها، ولازم الأكل اللي بناكله يبقى مطبوخ كويس وخصوصًا الأسماك واللحوم، ده غير إننا لازم نهتم بغسيل أي حاجة هناكلها زيّ الفاكهة والخضار، ونشرب مياه معقمة لإنه في الغالب بييجي من المياه الملوثة.

أخر كلمة: ماتفوتوش قراءة: جنا دياب وإعلانها عن إصابتها بـ ADHD.. حاجات مانعرفهاش عن المرض ده

تعليقات
Loading...
Tweet
Share
Share
Pin