مسلسلات عن الفترة من الأربعينات للستينات: ليه الناس بتحب النوع ده من الدراما؟

في آخر خمس سنين بالذات لاحظنا انتشار مسلسلات في رمضان بتدور أحداثها في فترة زمنية قديمة، خصوصًا فترة الأربعينات والخمسينات وكمان الستينات، والناس ابتدت تدي اهتمام للنوع ده من المسلسلات أكتر من المسلسلات اللي بيتكلموا عن زمننا دلوقتي، يمكن بسبب إن الناس شايفة إن زمان كان أحسن أو أهدى وكان زمن رايق؟ أو يمكن بنحب نهرب من اللي عايشينه دلوقتي؟ أو بنحب نشوف الناس كانت عايشة إزاي زمان ونحط نفسنا مكان الشخصيات اللي في الأحداث في الزمن ده؟

من 2016، بعد مسلسل جراند أوتيل ونجاحه الكبير، واللي معظمنا حتى لو مش بيحب يتفرج على مسلسلات في رمضان لكنه اتشد للمسلسل وحب يتابعه، وكان بطولة عدد من النجوم المهمين اللي فعلًا قدروا يقدموا مسلسل نجح جدًا مع الجمهور، وفضل معلق معاهم لفترة كبيرة، النجوم دول كانوا عمرو يوسف وأمينة خليل ومحمد ممدوح ودينا الشربيني وسوسن بدر وأحمد داوود وأنوشكا وكتير من اللي قدروا يعملوا مسلسل يخلي الناس تحب فعلًا تتفرج على أحداث بتدور في الزمن ده، ومن بعد رمضان ده، ابتدت الساحة الفنية تتجه للنوع ده من الدراما وشوفنا بعدها مسلسلات بتدور أحداثها عن زمان، ولحد رمضان 2021 اللي ابتدينا نشوف إعلانات مسلسلاته، تعالوا نشوف في السنين القليلة اللي فاتت إيه المسلسلات اللي كانت أحداثها في الفترة الزمنية القديمة دي.

عن: Al Jaras

السنة دي، مسلسل قصر النيل بطولة دينا الشربيني، ومسلسل موسى بطولة محمد رمضان، بتدور أحداثهم في فترة الأربعينات والخمسينات، غير إنه هيبقى صراع درامي من ناحية الديكور واللبس والتصوير، لكن كمان الصراع الدرامي هيكون قوي، بالنسبة لمسلسل دينا الشربيني، هنشوف مباراة تمثيلية بينها وبين ريهام عبدالغفور، أما مسلسل محمد رمضان فهنشوف صراع قوي في التمثيل بينه وبين رياض الخولي جنب مشاركة صبري فواز، اللي بيشارك في المسلسلين، بدورين مختلفين تمامًا، وده هيكون تحدي كبير لكن كالعادة مستنيين منه أدوار مختلفة وبإتقان شديد.

ومن المسلسلات اللي معلقة في ذاكرة الجمهور من الفترة دي، مسلسل أهو ده صار، اللي جمع بين نجوم كتير كبار، وكان بيحكي عن قصص في العصر الحالي، وقصص من أزمنة قديمة بمرور الزمن بشكل متوازي بين الاتنين، واتعرض لأول مرة في رمضان 2019.

وفي 2018، شوفنا مسلسل ليالي أوجيني، اللي بتدور أحداثه في فترة الأربعينات بطولة أمينة خليل وظافر العابدين وكارمن بصيبص، بأجواء وديكور ولبس وتفاصيل حسسونا إننا رجعنا للزمن ده وعايشين فيه معاهم، ونجح وقتها نجاح كبير.

وفي نفس السنة، شوفنا مسلسل اختفاء لنيللي كريم، وأحداثه بتدور في الستينات، واللي تعتبر مختلفة شوية، لكنها فترة زمنية مميزة برضه الناس حبت تتفرج عليها، والمسلسل شاركها البطولة فيه محمد ممدوح وهشام سليم وبسمة، وكان تركيبة مختلفة بتجمع بين زمننا وبين الستينات.

آخر كلمة: قولولنا إيه أكتر فترة بتحبوا تتفرجوا عليها في الدراما؟

تعليقات
Loading...
Tweet
Share
Share
Pin