مسلسلات جديدة هتتعرض خارج موسم رمضان على منصات أونلاين

الفترة دي معظم الأخبار الفنية هتلاقيها بتتكلم عن المسلسلات المشاركة في السباق الرمضاني، من بروموهات جديدة لبوسترات رسمية وغيرها من الأخبار.. لكن إحنا حابين نتكلم عن الأعمال الدرامية، اللي مش هتقتحم الماراثون الرمضاني وهتتعرض off season الشهر ده على منصات أونلاين زيّ شاهد ونتفليكس، واللي بالمناسبة مش حاجة وحشة إنهم مايشاركوش في السباق الرمضاني لإن لما يتم عرضهم لوحدهم في وقت فاضي، ده هيخلي عندهم مساحة ويحصلوا على الاهتمام اللي يستاهلوا، بدل ما يضيعوا وسط زحمة مسلسلات رمضان.. فمن غير ما نطول عليكم، دي المسلسلات اللي هنشوفها قريب على منصات الأونلاين المختلفة.

الآنسة فرح الجزء الثالث

سلسة أجزاء المسلسل ده واللي مأخوذ عن المسلسل الأمريكي “Jane the virgin”، من الأعمال اللي نفسنا يكون ليهم عدد لا متناهي من المواسم علشان نقدر نستمتع بالأحداث الكوميدية واللطيفة اللي بنشوفها بين الشخصيات. وبعد نجاح الجزء الأول والتاني من المسلسل، وانتهاء الجزء التاني على مشهد مشوق، من المقرر عرض أول حلقة من الموسم التالت بكره الموافق 8 مارس 2021 على منصة شاهد.

قارئة الفنجان

أما المسلسل التاني اللي هيتعرض كمان في شهر مارس خارج السباق الرمضاني هو قارئة الفنجان اللي هيتكون من 10 حلقات وهيجمع بين فنانين كتير من الوطن العربي زيّ أحمد فهمي وورد الخال وباسم مغنية وروان مهدي ومحمود الليثي، ومن إخراج محمد جمعة وتأليف إياد صالح.. والعمل ده بينتمي لفئة الرعب والإثارة اللي بدأنا نشوف إقبال عليها في الفترة الأخيرة، وهيركز على تأثير التكنولوجيا في حياة بعض الناس، وعن طريق أبلكيشن اسمه قارئة الفنجان، حياة شخصيات المسلسل كلها بتتقلب. المسلسل هيتعرض على منصة شاهد VIP يوم 12 من شهر مارس الجاري.

قيد مجهول

مسلسل سوري من بطولة باسل الخياط وعبدالمنعم العمايري وهيا مرعشلي، وهيتكون من 8 حلقات وده بيعتبر العمل الأول للمخرج السدير مسعود ومن تأليف محمد أبو لبن ولواء يازجي. ومن المقرر عرض المسلسل يوم 18 مارس على منصة OSN.

أبلة فاهيتا دراما كوين

من فترة كانت نزلت أبلة فاهيتا على حسابها الشخصي بالانستجرام البرومو لمسلسلها الجديد “أبلة فاهيتا دراما كوين” واللي هيشاركها في المسلسل باسم سمرة، ودنيا ماهر، وأسامة عبد الله، ومنى ممدوح، وأحداث المسلسل بتدور في 6 حلقات من إخراج خالد مرعي، وهيترجم لأكتر من لغة وكمان هيتعرض في أكتر من 190 دولة مختلفة في العالم. وهيتم عرض المسلسل يوم 15 مارس.

آخر كلمة: ناويين تتابعوا واحد من المسلسلات دي.. أو كلهم؟ شاركونا أفكاركم أو قراراتكم في التعليقات!

تعليقات
Loading...
Tweet
Share
Share
Pin