في أدوار سينمائية بتعلق معانا لو معمولة صح، ولو فكرت ازاي مهنة المحاماة اتقدمت بأشكال مختلفة في السينما المصرية من زمان لدلوقتي، هتلاقي أدوار أيقونية خلتنا ناخد فكرة عن المحاماة حتى لو الفكرة دي هزلية ومالهاش علاقة بالواقع، لكنها خلتنا نتمنى إن لو المهنة في الواقع كده بالفعل، وفي ممثلين خلونا نحس بعد تقديمهم لدور المحامي، إنهم قفلوا الباب وراهم.
حسن سبانخ – الأفوكاتو
في فيلم (الأفوكاتو)، عادل إمام قدم شخصية هزلية لا تمت للواقع لكن كان نفسنا إنها تبقى حقيقية، ومرافعاته اللي جمع فيها بين الضحك والقانون والمقاوحة، وبين سجنه هو شخصيًا بسبب مرافعاته. حسن سبانخ نموذج لطلبة حقوق كان نفسهم يلاقوا الواقع زيه، بغض النظر عن اللي لقوه في الواقع، ممكن نشوف نموذج من مرافعات حسن سبانخ:
سيد أوبرا – أوبرا عايدة
الفنان الكبير يحيى الفخراني قدر يقدم نموذج فريد من نوعه للمحامي في مسلسل (أوبرا عايدة)، وفي مشهد بعينه هو اللي متعلق في ذاكرتنا الدور بسببه، وهو عبقرية أوبرا في اللعب بالكلام واللغة العربية علشان يقول الكلام اللي هو عايزه بمعنيين، وبمنتهى الحرفنة.
وده النموذج اللي فعلًا يعتبر قفل بعده باب المحاماة، المهنة كلها لازم تتعلم منه المحاماة وخفة الدم والذكاء.
حسين – عايز حقي
الخناقة كلها زي ما أنتم عارفين قامت علشان 10 متر سيراميك فرز تاني، في المرافعة الشهيرة للجهبز حسين، اللي راح يترافع فيها عن صابر الطيب في قضية بيع نصيبه في المال العام، ومصيبة على البلد كلها، لكن زي ما أنتم عارفين برضه أبو الشوق خلّاه يخاطر بمستقبله المهني، بس للأسف خلاه يضيعه خالص.
متخيلين لو عندكم قضية وجبتوا المتر حسين يترافع فيها؟
راتب – السفارة في العمارة
قضية من أتقل وأعمق ما يكون، قضية بترمز لقضية قومية وعربية كبيرة وعظيمة، لكن الفنان أحمد راتب لما اترافع فيها خلانا كلنا مبهورين، بغض النظر عن محامين الخصم اللي كانوا سادين القاعة كلها، لكن مرافعته دفعت موكله نفسه إنه يقوم يتكلم علشان ينهي المهزلة اللي بتحصل دي، والمشكلة إنه طول الفيلم بيتكلم بثقة وإن القضية مضمونة وفي جيبه.
مصطفى خلف – ضد الحكومة
حبينا نختم الليستة بواحد من أقوى أدوار الراحل أحمد زكي، وأقوى المحاضرات السياسية اللي اتقالت في محكمة، وده لأنها مش مجرد مرافعة عادية، أحمد زكي في مرافعته الشهيرة قال: “كلنا فاسدون.. لا استثني أحدًا” اللي حتى لو أنت ماشوفتش الفيلم هتكون عارف المشهد الأيقوني ده وعدى عليك قبل كده.
أحمد زكي وقف قدام الكل قال: “إننى لا أطالب سوى بمحاسبة المسؤولين الحقيقين عن قتل عشرين تلميذًا لم يجنوا شيئًا سوى أنهم أبنائنا. أبناء العجز والإهمال والتردي.. كلنا فاسدون… كلنا فاسدون…. لا أستثني أحدًا حتى بالصمت العاجز الموافق قليل الحيلة”.
تفتكروا المهنة دي محتاجة مين من الشخصيات اللي قلنا عليها؟ الجد والمتلاعب؟ ولا الهزلي اللي برضه في الآخر بيوصل للي هو عايزه؟
ومين في الشخصيات دي هو المحامي المفضل لكم؟