ليه كلنا محتاجين صاحب زي سمير صبري في حياتنا؟

على مدار مشواره الفني شوفنا سمير صبري الفنان وسمير الإنسان صاحب صاحبه الجدع اللي معاك في أي موقف أو شدة ومش مستني منك أي مقابل، سمير صبري وقت ما كان في قمة توهجه الفني والإعلامي كان في نفس الوقت صاحب جدع لكل حد في الوسط الفني، سواء كان ليه معاه صلة صداقة قوية أو لأ.

كان بيساعد وبيدعم من غير ما كان حد يعرف أي حاجة، إنسانيته طغت على كل حاجة في شخصيته، الموضوع دة ماتعرفش غير متأخر بعد سنين كتير لما بدأ الفنانين يصرحوا بيه في لقائتهم الإعلامية، حبينا نتكلم عن المواقف دي ونبرزها، علشان ناس أكتر تعرف مين هو سمير صبري الشخص اللي أثبت إن لازم الشخص يبقى إنسان قبل ما يكون فنان.

سامية جمال

  • اتسبب في رجوع سامية جمال للتمثيل من تاني بعد ما اعتزلت، وقتها كانت بتمر بأزمة مالية كبيرة لدرجة إنها ماكنتش قادرة حتى تدفع لتصليح بيتها اللي كانت مستأجراه في الزمالك، كان وقتها سمير بيأسس فرقة استعراضية وبيغني في فنادق 5 نجوم، عرض على المدير فكرة استعراض يتقدم كل يوم اتنين اسمه “الليلة الكبيرة” وتقدمه سامية جمال.
  • قالت ساعتها سامية عن الموقف دة وعن سمير ” إنه رجعها للحياة تاني”

سعاد حسني

  • كان دايمًا على تواصل معاها وخصوصًا أثناء فترة علاجها في لندن كان بيجيلها مخصوص كل شوية ، جمعت بينهم علاقة صداقة قوية، ولما اتوفت سعاد حسني كان هو الوحيد اللي عنده يقين تام إنها اتقتلت مانتحرتش، لدرجة إنه عمل سلسلة من الحلقات الوثائقية كانت أشبه بالتحقيقات بعد وفاتها اسمها “لغز رحيل السندريلا”

تحية كاريوكا

كان بيناديها ” ماما” وبتقولوا “انت ابني” ، جمعت بينهم علاقة قوية وكان الفنان الوحيد اللي بيواظب السؤال عليها وزيارتها وقت لما كانت في المستشفى سنة 1999 وفضل يتردد عليها خلال آخر سنوات حياتها، وظهر في أخر حلقات مسلسل كايروكا اللي اتكلم عن حياتها.

نور الشريف

قال نور الشريف في آخر حوار تلفزيوني مع هالة سرحان، إن في عز أزمته وقت اتهامه بالخيانة في الصحف القومية بسبب فيلم ناجي العلي، كان سمير الوحيد اللي كان بيسأل عنه.

محمود عبد العزيز

سمير صبري كان الفنان الوحيد اللي أخده معاه محمود عبد العزيز في رحلته العلاجية في باريس، وقت لما اشتبه الأطباء بإصابته بسرطان المعدة، فسافر معاه ووصاه هو بذات لو مات يدفن في الإسكندرية.

أغلب الفنانين اللي اتوفوا أيامهم وحياتهم الأخيرة قضوها في صحبة سمير صبري، في أي عزا تلاقيه أول واحد، وأي واجب تلاقيه موجود، شخص ماينفعش غير إنك تحترمه.

آخر كلمة: ماتفوتوش قراءة: في لفتة إنسانية: محمد صلاح ينقذ رجل مسن ومشرد من التنمر في ليفربول

تعليقات
Loading...
Tweet
Share
Share
Pin