6 مطاعم بتقدملك تجربة المأكولات البحرية والأسماك في مصر

الأكل مزاج وخصوصًا في مصر، شعب أكيل معروف بتقديره وحبه للأكل. والمأكولات البحرية، بعيدًا عن قيمتها الغذائية، فهي من أنواع الأكل اللي بتحتاج لاستعداد وأنت بتختار المطعم اللي هتاكل فيه قبل ما تروح. وكمان المأكولات البحرية معروف إن في أنواع منها بتبقى غالية، فلازم تاكل في مطعم مضمون وبيقدم الأكل طازة. وبناءًا على ترشيحات الناس للمطاعم دي، قررنا نجيب لكم أشهر مطاعم سمك ومأكولات بحرية في مصر والقرار ليكم في الأخر.

الفردوس – القصير

مطعم الفردوس موجود في مدينة القصير. ودايمًا ميزة المطاعم اللي جنب البحر إن الأكل بييجي لك طازة من البحر على سفرتك، ومن ضمن الأطباق اللي بيقدمها هناك هو طبق الجمبري المقلي وسمك الدنيس المشوي والمحار بالليمون والسلطعونات المسلوقة. المكان مناسب لذوي الاحتياجات الخاصة والأطفال وفي ساحات داخلية وخارجية، بيطل على البحر على طول وفي أماكن للشيشية، ولما الجو يبقى مناسب بيطلعوا الترابيزات برا جنب المياه، وتقدر تاكل وأنت مدلدل رجليك في الرملة.

من ترشيحات الناس وآرائهم أكتر حاجة مميزة ممكن تاكلها الشوربة، بس في ناس بتقول إن الأسعار غالية شوية وناس بتقول إنها في المتوسط، شوف المنيو وقرر المناسب ليك هنا. مالقتش صفحة لهم على الفيس بوك بس تقدر تتواصل معاهم من هنا 01283324884.

 قدورة – إسكندرية

من أشهر مطاعم السمك في إسكندرية وليه أكتر من فرع في القاهرة، بيتميز بالكافيار والسبيط والسمك البلطي والبهارات المختلفة والسلطة وشوربة السي فود. شهرته مسمعة لجنسيات تانية، عنده كل أنواع السمك الوقار وموسى ومرجان ومياس والدنيس والقاروص والحمام والمشط. بتختار السمك من مكان زيّ سوق السمك كده وبيطبخ لك اللي أنت عايزه، وفي أطباق للناس اللي مش بتحب السمك أوي زيّ رز بالجمبري واسباجيتي بالسي فود وورق العنب مع السمك.

ليهم صفحة على الفيس بوك وموقع رسمي بيضم كل الفروع، بس تقدر تروح فرع إسكندرية من شارع جمال عبد الناصر ورا شيراتون، وتقدر تتواصل معاهم من الأرقام دي 035802182 – 035802147 – 03 5802147، وده المكان بالظبط.

عروس البحر – السويس

جربت😉😉😉😉
😋😋🧜🏼🧜🏼🧜🏼😋😋😋

Posted by Aroset El Bahr on Monday, November 29, 2021

في العادي بنشوف صينية سمك صيادية، لكن في المطعم ده عندهم شوربة الصيادية، وهي عبارة عن شوربة بصل وسمك، بس خلي بالك السمك فيه شوك يعني لازم تطلع بإيدك الأول من الشوربة وتاكله. وفي اختراعات تانية زيّ السبيط المحشي سي فود، والسمك الملفوف بالورق العنب ومطبوخة جواه. المكان واسع وبيضم دورين وفي ترابيزات كتير، والمنيو بسيط محطوط فيه أسعار كل حاجة، ماعدا بعض الأطباق اللي بيتحدد سعرها في اليوم، بس ممكن تستنى شوية لحد ما الحاجة تجهز عندهم. ومن تعليقات الناس والتقييمات اللي عاملينها قالوا إن أحسن حاجة ممكن تاكلها من عندهم هي شوربة السي فود والجمبري المقلي والمكرونة الاسباجيتي بالجمبري والصوص الأحمر .

هتلاقيه في كورنيش السويس الجديد، ولو عايز المكان بالإحداثيات من هنا، ودي برضه أرقامهم لو ماعرفتش توصل: 01115917770، 0623320597، وله فرع تاني عند ستاد السويس والمكان مفتوح من 11 الصبح ل2 الصبح.

أسماك المحافظة – القاهرة

في سوق الحي السادس من أكتوبر هتلاقي مطعم أسماك المحافظة، بيعملوا فيه الأطباق العادية وافتكاسات تانية بتاعتهم واخدينها من دول مختلفة بتعمل السي فود، زيّ المطبخ المغربي والمطبخ الهندي. لمكان كان بيبيع بس وماكنش فيه مطعم، لكن مؤخرًا فتح صالة تقدر تطلع تاكل فيها لو بتحب الأكل يتسوى قدامك.

لو حابب تجرب الافتكاسات عندهم ميكس جريل سي فود؛ قاروص وطاجن بالزيت والطماطم والبطاطس، وعندهم كمان الجمبري الملفوف بالسمك الفيليه، وفي طبق بخلطة سرية ومكونه الرئيسي رز بالسيفود والجبنة، وعندهم حواوشي السي فود بالمسطردة.

بيهتموا على صفحتهم إنهم يعرضوا لايف كل يوم وبتشوف فيه تشكيلات السمك الموجودة في السوق وأسعارها، وكمان بيصوروا الطباخين لايف وهما بيطبخوا وساعات بيعملوا مسابقات وبيقدموا جوائز على الصفحة، ودي صفحتهم على الفيس بوك هنا. بس خالي بالك لو حبيت تطلب دليفري مكتوب في البايو بتاع الإنستجرام عندهم إن التوصيل داخل 6 أكتوبر بس.

بالنسبة للمكان هتلاقيه في شارع أحمد لطفي السيد، قسم 6 أكتوبر، الجيزة، ورقمهم 01060474784، وبيكون مفتوح من 8 الصبح ل9 بليل.

أبو العربي – القاهرة

غير الأطباق العادية، عندهم قسم في المنيو اسمه أطباق أبو العربي الخاصة وأسمائها لطيفة زيّ طبق الشهيد أبو العربي، واللي عبارة عن جمبري واستاكوزا وكابوريا وقاروص وجندوفلي وسبيط، وطبق حرب 65 وعبارة عن بلح البحر وكفتة الجمبري وبوري وبلطي، وجردل أبو العربي وقرعة أبو العربي واللي عبارة عن أرز بالموتزيريلا وكابوريا وفيلية وسبيط، ولو عايز تبص على المنيو من نفسك، ممكن تبص من هنا. ده غير إن في عرض كده بيتعمل للمكبكة وهي بتتسوى على الرمل وأنت قاعد وبيشغلوا لك موسيقى بورسعيدي والجرسونات لابسين اللبس بتاع الصيادين، ديكورات المطعم كلها معمولة من ألوان البحر وتفاصيلها تحسسك إنك قاعد على البحر، من قواقع لعوامات للشبكة والصنارة.

عنده فروع في التجمع الخامس وفي مدينة نصر، تقدر توصل لهم من هنا أو تكلمهم على طول من الأرقام دي 0228105528- 01210948888.

بلبع – إسكندرية

بتحب تاكل الجمبري 🍤🍤 بأي طريقة من الشيف بلبع ؟!
الشيف بلبع ملك السي فود

دلوقتي تقدر تطلب أون لاين من تطبيق بلبع ،…

Posted by Balbaa Village For Grills. on Saturday, June 11, 2022

موجود في إسكندرية، الأسماك مش هي تخصصه الوحيد في كمان مشويات. الديكور حواليك هتلاقيه كله صور وتابلوهات عن إسكندرية زمان، وأنت قاعد بتاكل هتلاقي أحواض السمك من حواليك وهي بتبلبط في المياه، وتقدر تدخل تعبي السمك اللي عايزه من عندها وتاكله طازة وهو لسه طالع من المياه؛ شوربة السي فود والجمبري المقلي من الأطباق المميزة عنده.

في فروع في سيدي بشر وسيدي وطنطا، وفتحوا قريب فرع في الساحل تقدر تطلب من الخط الساخن بتاعهم 16941، وتقدر تطلب من التطبيق بتاعهم. ولو مزنوق في عزومة، المكان يسد لإنه متخصص في العزايم الكبيرة بالكميات المطلوبة، ولو حابب تسألهم على الفيس بوك تقدر تبعت لهم على الصفحة هتلاقيهم بيردوا عليك، ولو عايز تفاصيل أكتر بيوصلوك بالفرع. مواعيد المطعم من 12 ظهر لحد الساعة 2 الصبح.

أخر كلمة: ماتفوتوش قراءة: 9 من أهم مطاعم الأكل المصري اللي هتلاقيها في القاهرة

تعليقات
Loading...
Tweet
Share
Share
Pin