لو بتدوري على حيل بسيطة لمكياج أحلى.. فيديوهات آية عبد الحميد هتساعدك

وسط صيحات الموضة في المكياج بالطرق المختلفة اللي ممكن نتبعها علشان نوصل لأحلى شكل مناسب للبس وكمان المناسبة أو الحدث اللي رايحينه، وكلنا بندور على الألوان والأسلوب والأدوات في المكياج اللي تناسب ملامحنا وشكل وشنا، وظهرت كمان حيل مختلفة لإخفاء عيوب البشرة أو استخدامات مختلفة لأدوات الميكاب أو المستحضرات التجميلية نفسها.. لو بتدوري على حيل بسيطة بأدوات وطريقة سهلة وسريعة علشان توصلي لأحسن إطلالة، هنساعدك بفيديوهات لخبيرة المكياج آية عبد الحميد، اللي بتعمل يوم التلات من كل أسبوع فكرة جديدة لحيل مختلفة في المكياج.

إزاي نرفع شكل العين باستخدام الرموش

في الفيديو ده بتعلمنا إزاي نوصل لشكل العيون المرفوعة بطريقة سهلة وسريعة، وده اللي استخدمته آية لمكياج الفنانة هدى المفتي في حفل افتتاح مهرجان الجونة السينمائي في دورته الرابعة السنادي.

إزاي نثبت الروج الـ matte لفترة أطول

بنات كتير بتواجهها مشكلة عدم ثبات الروج خصوصًا لو liquid matte، أو مشكلة إنه بيتقشر وشكله يبقي مش حلو، علشان كده آية عملت الفيديو ده علشان تعرفنا طريقة بسيطة باستخدام كريم العيون علشان نحصل على روج ثابت لفترة أطول.

إزاي نخفي الحبوب

ودي تقريبًا أكتر مشكلة البنات بتدور على حل ليها علشان معظمنا بيعاني من الحبوب أيًا كان سببها، خصوصًا الحبوب اللي بتظهرلنا في وقت أي مناسبة مهمة ومش بنلحق نعالجها، في الفيديو ده هنعرف إزاي نداري الحبوب باستخدام كريمات وبكذا طريقة تختاري منها اللي يناسبك.

مش بس للبشرة والمكياج، آية كمان بتقدم نصايح بسيطة للمشاكل اللي بنقابلها لشعرنا.

إزاي نتصرف بطريقة سريعة لو شعرنا هايش

أوقات كتير بيبقى شعرنا مش في أحسن حالاته، وساعتها مش بنعرف إزاي ممكن نتعامل معاه لو مضطرين لخروجة أو مناسبة مهمة، وهنا آية بتنصح بعمل bun بسيطة وباستخدام فرشاة الأسنان، نحل مشكلة الهيشان.

طريقة سهلة للـ Smokey Eyes

الـ Smokey Eyes من أكتر الحاجات اللي بتفضلها البنات في المناسبات لكن صعوبة الحصول عليه بطريقة مظبوطة هي المشكلة اللي بتواجههم، علشان كده في الفيديو ده طريقة بسيطة وسريعة علشان تحصلي على اللوك المفضل ليكي في أي مناسبة مهمة.

إزاي تختاري لون الـ Foundation المناسب ليكي

بنات كتير مش بتعرف تختار درجة لون الـ foundation المناسبة لبشرتها، وده علشان لما بنيجي نقارنها بلون بشرتنا بنختار الأماكن الغلط في جسمنا، علشان كده آية في الفيديو ده بتعرفنا إزاي نختار الدرجة المناسبة وإحنا بنشتريه.

إزاي نظبط شكل حواجبنا

غير التاتو أو الميكروبليدينج، إزاي نحصل على شكل حواجب كويس بمكياج بسيط من غير ما يكون تقيل أو مش مناسب.

آخر كلمة: ماتفوتوش قراءة: بتواجهي مشكلة في اختيارِك لِلبسك؟ جبنالك 5 أماكن لملابس محجبات على الموضة

تعليقات
Loading...
Tweet
Share
Share
Pin