للمنحوسين في كل مكان.. لازم تتعرفوا على قوانين ميرفي

لكل واحد النور بيقطع لما يجيله شغل، لكل واحدة بتطلعلها حبوب يوم فرح، لكل منحوسة ومنحوس أي حاجة بيعوزها بتختفي، لازم تتعرفوا على قوانين ميرفي للمنحوسين، علشان لو في احتمال إن الموضوع يبوظ، فهو هيبوظ.

قوانين ميرفي مشهورة للي بيحبوا يقروا من زمان، بس انضم ليها معجبين جداد من اللي شافوا مسلسل “ما وراء الطبيعة” مؤخرًا، وبيسمعوا اسم ميرفي طول الحلقات ومش عارفين هو مين، اتعرفوا عليه وعلى قايمة قوانينه للمنحوسين، علشان تقولولنا أنهي أكتر قانون فيهم بيعبر عن حياتكم.

مين ميرفي؟

المهندس إدوارد مورفي

هو مهندس طيران كان شغال على مشروع سنة 1949، وحصل فيه خطأ تقني بوظ الدنيا، ولأن الخطأ كان متوقع ومذكور إنه محتمل بنسبة ضئيلة في دراسات قديمة عن المجال ده، قال المهندس للتقني المسئول وقتها: أي حاجة غلط متوقع تحصل، يبقى هتحصل.

الجملة اتشهرت أوي في الموقع من وقتها، وتسببت إنه المهندسين حطوا قايمة بكل احتمالات الغلط المحتملة في مشروعهم بكل خطواته، مهما كانت نسبة حصولها قليلة، والنتيجة كانت ارتفاع معايير الأمان والسلامة في الموقع بشكل مبهر، وده اللي خلى المهندس ميرفي يكمل في سكته لحصر قوانين للنحس بشكل علمي.

قانون ميرفي: أي شيء ينفع يحصل فيه مشكلة، هتحصل فيه مشكلة.

إدوارد ميرفي

ده ملخص القانون الأصلي اللي اتفرعت منه قايمة قوانين لتنظيم النحس، يمكن ملهاش أساس علمي واضح، بس هي قايمة على مبدأ الاحتمالات، وهو مبدأ رياضي يعني مش بنفتي وخلاص برضه.

شوف كمان: فنانين لمعوا بسبب مسلسل ما وراء الطبيعة.

عدد القوانين الأصلي 60، بس احنا هنلخصهالك ونجيب لك المفيد في حياتنا بس:

  • لو ضاع منك حاجة، مش هتظهر إلا لما تشتري غيرها.
  • حاجتك اللي بتحبها أوي بتبوظ بسرعة أوي.
  • لو سيبت مشاكلك تحل نفسها هتروح الأوضاع للأسوأ.
  • آخر 10% من مشروعك بيستغرقوا 90% من وقتك.
  • لو كل حاجة ماشية حلو، يبقى انت ناسي حاجة مهمة.

قوانين ميرفي والتشاؤمية:

يمكن يبان الموضوع إننا مش متفائلين لا سمح الله، لكن الهدف الحقيقي للقوانين دي مش كده، الهدف الحقيقي ورا إنك تعرف أسوأ سيناريو وتستعد ليه، هو حالة الرضا والتقبل اللي بتحصل بعد كده، انت عارف إيه أوحش حاجة ممكن تحصل ومستعد ليها، ومش خايف منها، فمش هتبقى مخضوض ولا زعلان لو حصلت.

آخر كلمة: ميرفي بيقولك ركز على النهارده وكفاية تكشير واضحك، لسبب وجيه جدًا: غدًا سيكون أسوأ.

تعليقات
Loading...
Tweet
Share
Share
Pin