سباق رمضان 2021 كان مليان بالأعمال الفنية المتنوعة، اللي تناولت قضايا مختلفة وهادفة بطرق مبسطة وسهلة على المُشاهد العادي إنه يستوعبها ويهضمها. علشان كده كان طبيعي إننا نفرح بخبر عمل أجزاء تانية من بعض الأعمال الدرامية اللي شهدها شهر رمضان اللي فات، واللي احنا متطلعين إننا نشوفها بنفس قوة وجودة الأجزاء الأولى، لو ماكانتش أقوى. مش هنبالغ لو قولنا إننا نتمنى نشوف أجزاء جديدة من تقريبًا معظم الأعمال اللي اتعرضت، بس بعيدًا عن الأمنية دي، تعالوا نشوف الأعمال اللي فعلًا هنشوفها على أرض الواقع في جزء تاني (أو ثالث) على شاشات التلفزيون السنة اللي جاية.
الاختيار 3
مسلسل الاختيار من أقوى المسلسلات اللي شهدتها الدراما المصرية والعربية في السنين الأخيرة. العمل متكامل من حيث القصة الهادفة، الأحداث الحقيقية، الإخراج، والممثلين الثقال اللي بيجسدوا دور أبطال رجال الشرطة والقوات المسلحة. فأول جزئين من المسلسل حققوا نجاحات ساحقة بكل ما تحمله الكلمة من معنى، علشان كده كان طبيعي إننا نستنى جزء ثالث من العمل الناجح في السباق الرمضاني اللي جاي، واللي بيقال إن النجم كريم عبدالعزيز وأحمد مكي هيستمروا في أدوار البطولة، وهينضم لهم الفنان أحمد عز.
هجمة مرتدة 2
مسلسل تاني تناول قضية من ملف المخابرات العامة عرض أحداث حقيقية حصلت في السنوات الأخيرة، كان من بطولة أحمد عز وهند صبري، انتهت آخر حلقاته بالإعلان عن جزء تاني. والحقيقة إن الأعمال الهادفة اللي من النوع ده بتقوم برفع الحس والروح الوطنية عند الشعب، بالإضافة لتثقيف الجمهور وإطلاعهم على ملابسات وتفاصيل دقيقة عن وقائع مهمة حدثت بالفعل، علشان كده احنا سعداء إن لسه في انتظارنا عمل دسم هيشبع رغبة المشاهد في إنه يعرف أكتر.
فارس بلا جواز
بعد غياب الفنان مصطفى قمر عن الأعمال الدرامية لسنين طويلة، طل من جديد في شاشات التلفزيون السنة دي من خلال تقديمه للمسلسل الكوميدي فارس بلا جواز اللي بيشاركه فيه البطولة طارق عبدالعزيز وطارق الإبياري ومحمد ثروت، بالإضافة لاستضافة المسلسل لمجموعة من النجوم الكبار اللي ظهروا في بعض الحلقات كضيوف شرف. من خلال صفحته على الانستجرام، قال مصطفى قمر للجمهور يستنوه السنة اللي جاية في “فارس بعد الجواز”…