لساعات السفر الطويلة: نصائح علشان نتجنب اضطرابات الساعة البيولوجية

الساعة البيولوجية بيعتبروها المايسترو اللي بيظبط إيقاع حياة الإنسان. لإنها بتتحكم في شعورك بالنوم ووقت الصحيان والجوع وبتتحكم كمان في درجة حرارة الجسم، ورحلة واحدة طويلة بتعمل فواصل زمنية ممكن تقلب النظام ده من فوق لتحت.

أستاذ الطب النفسي بيقول إن العالم متقسم لـ ٢٤ منطقة زمنية، والمسافة بينهم ساعة واحدة، فلو سافر الشخص لمناطق زمنية أقل من خمس ساعات في العادي مش هيحصل مشكلة، بس المشكلة والمعاناة بتبدأ لما تبقى أكتر من 5 مناطق زمنية. ووقتها بيلاقي الجسم صعوبة في التكيف مع التوقيت الزمني الجديد وبيحصل خلل في التكيف مع الإيقاع اليومي بسبب اختلاف الليل والنهار.

والموضوع بيبقى أسوأ حسب اتجاه السفر، فتلاقي صعوبة أكبر فى التكيف لو سافرت باتجاه الشرق غير لو سافرت باتجاه الغرب. وده لإن الساعة البيولوجية عندها قدرة إنها تتكيف مع قصر اليوم ويرجع الجسم لحالته الطبيعية وعملياته الحيوية أكتر ما تتكيف مع طول اليوم.

 المراكز الأمريكية لمكافحة الأمراض والوقاية بتنصح المسافرين بشوية نصايح:

قبل السفر بأيام قليلة، ممكن تبدأ في ضبط ساعة الجسم البيولوجية وفقًا للمنطقة الزمنية للبلد اللي أنت رايح لها.

  • لو هتسافر في اتجاه الغرب، نام بعد ساعة أو ساعتين من الوقت اللي متعود تنام فيه.
  • لو هتسافر في اتجاه الشرق، نام قبل ساعة أو ساعتين من الوقت المتعود عليه.
  • في حالة إنك بتعاني من اضطراب الرحلات الجوية الطويلة. ممكن تسأل دكتورك الخاص لو في وسائل تساعدك على النوم.
  • حاول تاخد وقت كافي من الراحة قبل الرحلة وتجهز كل حاجة قبلها بيومين. وأثناء الرحلة اشرب مياه كتير وسوائل دافية وتجنب أي أكل ممكن يعمل لك اضطرابات في المعدة. لإن من الأعراض الشائعة لاضطراب الساعة البيولوجية الإسهال والإمساك وعسر الهضم وفقدان للشهية.

أخر كلمة: ماتفوتوش قراءة: بتعانوا من مشاكل النوم؟ جبنالكم أسباب النوم المتقطع وإزاي نواجهه..

تعليقات
Loading...
Tweet
Share
Share
Pin