لدوره في فيلم “لما بنتولد”، محمد حاتم بيفوز في مهرجان مالمو للسينما بجائزة أفضل ممثل

أعلن الممثل المصري محمد حاتم على حسابه على إنستجرام عن فوزه بجائزة أفضل ممثل في مهرجان مالمو للسينما العربية في دورته العاشرة عن فيلم “لما بنتولد”، وكمان أعلن عن فوز مؤلفة الفيلم نادين شمس بجائزة أفضل سيناريو. وعبر عن سعادته الشديدة، وشكر كل اللي اشتغلوا معاه في الفيلم.

فيلم “لما بنتولد” هو فيلم مصري تم إنتاجه في سنة 2019، من إخراج تامر عزت، وإنتاج معتز عبد الوهاب، وتأليف نادين شمس، ومن بطولة محمد حاتم، وعمرو عابد، وإبتهال الصريطي، وحنان سليمان، وأمير عيد مغني فرقة كايروكي. وقصة الفيلم بتدور حولين “أسامة” اللي قام بدوره الفنان محمد حاتم، وهو شاب مسلم بيحب بنت مسيحية.

الفيلم شارك في مهرجانات تانية زي مهرجان الجونة السينمائي، ومهرجان أيام قرطاج السينمائية، ومهرجان القاهرة السينمائي الدولي. ودي تعتبر تاني جائزة للفنان محمد حاتم عن دوره في الفيلم، فهو فاز بجائزة أحسن ممثل صاعد في مسابقة االسينما المصرية.

عن: عين

محمد حاتم شارك في أول فيلم له “18 يوم” اللي شارك في مهرجان كان السينمائي، وبعد كده شارك في أعمال تانية ناجحة كتيرة زي مسلسلات “زي الورد”، و”طريقي”، و”جراند أوتيل”، و”لأعلى سعر”، و”أبو العروسة”، و”نسر الصعيد”.

عن: Masrawy

أما عن مؤلفة الفيلم نادين شمس، فكانت مؤلفة لأعمال ناجحة زي مسلسلات “موجة حارة”، و “قانون المراغي”، وفيلم “المائدة”، و”احنا اتقابلنا قبل كده”. توفت المؤلفة نادين شمس سنة 2014 بسبب مضاعفات في عملية جراحية، ولكن أعمالها ما زالت بتستقبل نجاح.

آخر كلمة: مصر مليانة مواهب قوية بتثبت نفسها في عمل بعد التاني..

تعليقات
Loading...
Tweet
Share
Share
Pin