الفرقة المصرية مسار إجباري لأول مرة هتحيي حفل في دبي إكسبو 2020، يوم الجمعة 22 أكتوبر الحالي، على مسرح الألفية dubai millennium amphitheatr، ودي تعتبر أول مشاركة لفرقة مصرية في معرض دبي “إكسبو 2020” ومستنيين نسمع منهم أغاني بنحبها هيغنوها هناك وهما بيمثلوا مصر في معرض يعتبر هو الأهم دلوقتي في الشرق الأوسط، تعالوا نشوف إيه هي الأغاني دي ونحضر نفسنا لإننا هنسمعهم بشكل مميز.
حاوي
تعتبر من أشهر أغانيهم القديمة في بدايتهم، لكنها مميزة وبيحبوا يغنوها في الحفلات، وناس كتير بتشوف إنها أغنية بتعبر عن حاجات كتير بتدور في بالهم وبتعبر عن شخصياتهم وأحلامهم واللي بيواجهوه في الواقع.
صباحك
دي يمكن أشهر أغنية ليهم، اللي يعرف الباند واللي مايعرفوش بيحبها وعارفها، أكيد أنت حتى لو ماكانش ده النوع المفضل ليك في المزيكا أو حتى مش متابع المزيكا المستقلة، برضه هتكون صادفتها بشكل أو بآخر.
اقرا الخبر
أول أغنية اتعرفوا بيها من بدايتهم، كانت من أشهر الأغاني اللي اتقدمت في فيلم “ميكروفون” واتعرف بيها الباند لناس كتير من جمهورهم.
نهايات الحكاوي
لايف، الموضوع بيبقى مختلف خالص.. أغنية من أكتر الأغاني لمسار إجباري علقت مع الناس فترة كبيرة من وقت نزولها في الألبوم.
شيروفوبيا
خدت وقت كبير وكانت hit وقت ما نزلت، خدت ميمز فترة كبيرة كمان وقتها، لكن الناس في كل حفلة بتستنى تسمعها، وتغني معاها بكل طاقتها.