لأول مرة: عرض آخر مسرحية للراحل سمير غانم “الزهر لما يلعب” على شاهد

بعد رحيل الفنان سمير غانم اللي أثر فينا كلنا، لكن الميزة إنه عمل تاريخ فني طويل يفكرنا بيه دايمًا، بأدوار مختلفة محفورة في ذاكرتنا، وإفيهات بنقولها كل يوم، كمان خبر حلو أعلنه تركي آل شيخ، بإنه هيتم عرض آخر أعمال الفنان الراحل سمير غانم، لأول مرة، وهي مسرحية “الزهر لما يلعب”، على منصة شاهد، ابتداءًا من يوم الجمعة الجاي 28 مايو، بالتعاون مع MBC وتحت رعاية هيئة الترفيه، لإحياء ذكرى الفنان العظيم. وأكيد هنبقى مبسوطين واحنا بنشوفه على الشاشة بعمل لأول مرة يتعرض.

المسرحية شارك فيها فنانين كتير بنحبهم زيّ شيرين ومنير مكرم وإيمان السيد وإيمي طلعت زكريا وطارق الإبياري، وبتدور أحداثها عن تاجر طيور بيتجوز كتير، وبيسعى للجواز من بنت أصغر منه فبيقع في مفارقات كوميدية. المسرحية تأليف أحمد الإبياري وإخراج طارق الإبياري. ومن الحاجات الجميلة، نهاية المسرحية بالأغنية المشهورة لسمير غانم “أنستونا.. أمال إيه” اللي كان بيغنيها في الفوازير زمان وكلنا اتعلقنا بيها.

الفنان سمير غانم مش أول فنان يتعرضله أعمال فنية لأول مرة بعد وفاته، في رمضان اللي فات، شوفنا أعمال فنية شارك فيها نجوم بنحبهم ورحلوا عن عالمنا قبل عرض الأعمال دي وقبل ما يشوفوها على الشاشة، زيّ الفنان يوسف شعبان، اللي شارك في مسلسل ملوك الجدعنة، لكنه توفى قبل رمضان، كمان الفنانة أحلام الجريتلي اللي شاركت في نسل الأغراب والقاهرة كابول، وتوفت قبل عرضهم، كمان الفنان هادي الجيار، اللي شارك في مسلسل الاختيار 2.

آخر كلمة: ماتفوتوش قراءة: معانا رغم وفاتها.. رجاء الجداوي بتطل علينا من جديد بأعمال فنية

تعليقات
Loading...
Tweet
Share
Share
Pin