كل اللي محتاج تعرفه عن لقاح جونسون آند جونسون الأمريكي اللي لسه واصل مصر

بدأت مصر في استقبال شحنات لقاح فيروس كورونا المستجد جونسون أند جونسون الأمريكي. وصلت النهاردة الصبح أول شحنة من اللقاح لمطار القاهرة الدولي والشحنة فيها 261 ألف و600 جرعة من اللقاح.

صفقة اللقاح الأمريكي جات بالتعاون مع الاتحاد الأفريقي ضمن خطة الوزارة للتنوع والتوسع في توفير اللقاحات المضادة لفيروس كورونا، وأكدت الدكتورة هالة زايد، وزيرة الصحة، استمرار استقبال شحنات تانية من اللقاح خلال الفترة الجاية.

وأكد الدكتور خالد مجاهد، مساعد وزير الصحة، إن شحنة لقاح «جونسون آند جونسون» الأمريكي اللي وصلت مطار القاهرة الدولي النهاردة الصبح هيتم توزيعها على المراكز المخصصة لتطعيم المسافرين للخارج بلقاحات فيروس كورونا، وفي 126 مركز متوزعين على مستوى محافظات الجمهورية.

إيه هو لقاح «جونسون آند جونسون» الأمريكي وإيه مميزاته؟

اللقاح من إنتاج شركة جونسون أند جونسون العالمية، وهي شركة إنتاج بيولوجي وصيدلي. اللقاح أثبت فعالية كبيرة جدًا في التصدي لفيروس الكورونا وبيتاخد علي شكل جرعة واحدة بس من غير الحاجة لجرعات مُعززة.

وينصح الأطباء بفترة فاصلة لمدة 14 يوم بين لقاح جونسون أند جونسون وأي لقاح مستخدم لأي حالة مرضية تانية، زي لقاحات الإنفلونزا.

وأثبت اللقاح فعالية بنسبة 85.4٪ ومع تجربته علي الأنواع الجديدة والمتحورة من فيروس كورونا أثبت فعالية واضحة في الوقاية منها.

بعض المخاطر اللي ممكن ترتبط باللقاح الأمريكي

كان في أخبار عن حالات جلطات حصلت بعد تلقي اللقاح في الولايات المتحدة، ولكن الحالات دي كانوا ستة بس من بين أكتر من سبعة ملايين شخص تم تطعيمهم بـ جيه أند جيه.

وحصل أن الولايات المتحدة قررت من كام شهر التخلص من من حوالي 60 مليون جرعة من اللقاح بعد ما ظهرت أدلة بتقول أن المصنع اللي عامل اللقاح ممكن يكون حصل فيه تلوث بعد ما اختلطت أجزاء من لقاح  لقاح “أسترازينيكا” مع لقاح جيه أند جيه.

والمصنع اللي اتقفل دلوقت بتديره شركة “إيميرجنت بيوسوليوشن”، ويقع في ولاية ميريلاند الأمريكية، ومحددتش إدارة الغذاء والدواء الأمريكية لحد دلوقت إذا كان من الممكن إعادة فتح المصنع مرة تانية أو لاء.

إيه هي لقاحات الكورونا اللي موجودة في مصر لحد دلوقت؟

لحد دلوقت في 6 لقاحات بيتم استخدامهم في مصر وهما “سينوفارم”، و”كوفيشيلد/استرازينيكا”، ولقاح سبوتنيك v ولقاح أسترازنيكا AZD 1222 ودلوقت انضملهم لقاح جيه أند جيه.

آخر كلمة: متفوتوش قراءة: وفاة الفنانة دلال عبد العزيز بسبب مضاعفات ما بعد الكورونا.

تعليقات
Loading...
Tweet
Share
Share
Pin