قميص التعبير عن التحرش وهدى المفتي: إيه القصة وليه حصل جدل وهجوم عليهم؟

كل البنات والسيدات بقت مهتمة بالتعبير عن غضبها لظاهرة التحرش، وبيحاولوا ينشروا الوعي بكل الطرق اللي يقدروا عليها في حدود مجالهم، سواء كانوا مسئولين، أو حتى ستات عادية، وزيّ ما المجلس القومي للمرأة بيطلق حملات ومبادرات كتير علشان يحموا بنات مصر من التحرش، الممثلين كمان بقوا يشتركوا في المبادرات دي علشان يزودوا التوعية، ويكونوا أصحاب موقف مش مجرد متفرجين.. وكمان مصممي الأزياء دخلوا في المبادرات.

فقام جاليري مشربية “Mashrabia Art Gallery” بنشر صور لقميص من تصميم سارة أيمن، مكتوبة عليه الألفاظ الخارجة اللي البنات بتسمعها في الشارع وكل مكان من المتحرشين، ونشرت الفنانة هدى المفتي صورة القميص ده في ستوري على حسابها الشخصي على انستجرام، وعبرت عن انبهارها الشديد بفكرة التصميم واللي بيعبر عن المعاناة اللي بتتعرضلها كل بنت دايمًا.

وبعد ما نشرت هدى صورة للتصميم ده، جالها رسائل نقد كتير مضمونها هو إن إزاي تنشري حاجة فيها ألفاظ خارجة كده، وإنها بكده بتخدش حياء البنات كلها وبتنشر نفس الألفاظ اللي إحنا في الأساس بنشتكي منها.. وده اللي خلى هدى تطلع تتكلم عبر حسابها الشخصي، وهي منفعلة جدًا من ردود الأفعال اللي جتلها، خصوصًا من البنات اللي المفروض يكونوا قادرين يتفهموا لإنهم هما كمان بيتعرضوا للمضايقات دي. وبالنسبة للرجالة الغاضبة.. هل عادي يتقال الكلام ده منكم كل يوم، ومش عادي إنهم يحكوا اللي بيتقال؟

وقالت هدى إن لو حد المفروض يتقالوا “عيب” فده ميتقالش غير للي بيقولوا الألفاظ الخارجة اللي مكتوبة على القميص دي للبنات، وإن ده ما هو إلا تعبير عن اللي بتتعرضله كل بنت، وإن مفيش أي حاجة غلط في اللي هي عملته.. فبين مؤيدين لرأي هدى في اللي بتقولوا وبين معارضين.. أنت واقف في صف مين فيهم؟

آخر كلمة: ماتفوتوش قراءة: ضحية جديدة بسبب التحرش.. لإمتي هتفضل البنات في خطر بسبب الظاهرة دي؟

تعليقات
Loading...
Tweet
Share
Share
Pin