قبل مباراة العودة مع الرجاء.. 24 بطولة للزمالك في القرن الـ 21

“الفارس الأبيض” أو “النادي الملكي” زيّ ما الجمهور بيحب يسميه، نادي الزمالك، قدر من ساعة ما اتأسس سنة 1911، إنه يحصد بطولات كتيرة محلية وأفريقية في مختلف الألعاب الفردية والجماعية زيّ كرة القدم واليد والسلة، وبقى ليه شعبية كبيرة في مصر وأفريقيا والوطن العربي، ولكن بما إن في مصر دايمًا بنهتم بكرة القدم أكتر وكمان الزمالك هيلعب مباراة العودة في الدور نصف نهائي ببطولة دوري أبطال أفريقيا كمان يومين مع فريق الرجاء المغربي.. فتعالوا نسترجع الـ 24 بطولة اللي حققهم “الملكي” في آخر 20 سنة.

البطولات المحلية

حقق الزمالك بطولة الدوري العام أربع مرات، من أصل 12 دوري في تاريخه، ودا كان مواسم (2000-2001، و2002-2003، و2003-2004، و2014-2015)، وفاز “الفارس الأبيض” بكأس مصر 8 مرات منهم أربع مرات متتالية من سنة 2013 لـ 2016، وكمان قدر الزمالك إنه يفوز ببطولة السوبر المصري أربع مرات (2001، 2002، 2016، 2020).

البطولات الأفريقية

الزمالك تاني أكتر الفرق الأفريقية تتويجًا بالبطولات القارية بـ 13 لقب، منهم دوري أبطال أفريقيا 5 مرات ولكن محققش البطولة إلا مرة واحدة في الـ 20 سنة الأخيرة وكانت سنة 2002، وكمان قدر يحقق “الملكي” بطولة الكونفيدرالية الأفريقية موسم 2018-2019 لأول مرة في تاريخه، إضافة إلى كأس السوبر الأفريقي (2003، و2020)، وكمان حقق كأس أفريقيا للأندية أبطال الكؤوس سنة 2000.

البطولات العربية

بطولات الفارس الأبيض كانت مكملة كمان على المستوى العربي، وقدر يحقق 3 بطولات، وهما كأس العرب للأندية الأبطال سنة 2003، وكأس السوبر المصري السعودي مرتين (2003، و2018).

والزمالك بيعتبر أول نادي مصري يصل لكأس العالم للأندية في 2002، ولكن البطولة اتلغت ساعتها، وكمان قدر يفوز بلقب أفضل نادي على مستوى العالم في سنة 2003 حسب بيانات الاتحاد الدولي لتاريخ وإحصائيات كرة القدم.

وبما إننا بنسترجع إنجازات الزمالك علشان نشجعه في مباراة العودة أمام فريق الرجاء المغربي يوم 4 نوفمبر اللي جاي في نصف نهائي بطولة دوري أبطال أفريقيا بعد ما فاز (1-0) في مباراة الذهاب بالمغرب، والفوز ده حقق 3 أرقام جديدة للزمالك.. تعالوا نعرفها.

الأول في نصف النهائي

الفوز على الرجاء في المغرب هو الأول للزمالك خارج ملعبه في الدور نصف النهائي من دوري أبطال أفريقيا.

فك العُقدة

الزمالك قدر يكسب لأول مرة خارج ملعبه من 4 سنين، وكانت أخر مباراة يفوز بيها الزمالك بره ملعبه في 2016 لما كسب فريق أنيمبا النيجيري (1-0).

أكتر الأجانب تسجيلًا

بهدفه في مباراة الذهاب، بن شرقي بقى أكتر اللاعبين الأجانب تسجيلًا للأهداف للزمالك في البطولات الأفريقية بـ 9 أهداف.

آخر كلمة: بنتمنى التوفيق للزمالك علشان يصعد ويبقى نهائي مصري لأول مرة.

تعليقات
Loading...
Tweet
Share
Share
Pin