قبل انطلاقه: دليلك للمهرجان القاهرة السينمائي الدولي في الدورة 44

بنستعد لحدث مهم هينطلق بكرة، مهرجان القاهرة السينمائي الدولي في الدورة الـ 44 من تاريخه هيكون السنة دي من 13 لـ 22 نوفمبر، وفعالياته هتكون زي كل سنة على أرض دار الأوبرا المصرية في القاهرة.

المهرجان ده يعتبر من أهم وأكبر المهرجانات السينمائية في مصر والعالم، بنستنى نشوف فيه أفلام مختلفة ومهمة من كل الثقافات، ده غير الندوات والمحاضرات اللي بتضمها فعاليات المهرجان على مدار 10 أيام تقدروا تحضروها وتعرفوا أكتر عن مجال السينما والإخراج والكتابة، وكمان تقدر تشوف نجومك المفضلين في ندوة وكمان تسألهم، طب نعمل كده ازاي؟ هنقولك تفاصيل الدورة دي من المهرجان وإيه اللي تقدر تحضره.

الأفلام

مهرجان القاهرة السينمائي بيختار أفلام من فئات مختلفة، سواء داخل المسابقات الرسمية للمهرجان أو خارجها، والأفلام بتتنوع بين الروائية والقصيرة والوثائقية والقصيرة، علشان المهتمين بأي نوع يقدروا يلاقوا أفلام تضيف لهم وتعرفهم عن ثقافات دول مختلفة وأفكار ومشاعر ناس عايشين معانا على نفس الأرض وتحت نفس السماء.

من وجهة نظري، المهرجانات السينمائية تعتبر فرصة عظيمة علشان تخرج برا عالمك الصغير، فرصة عقلك يشوف فيها أشكال وألوان من العالم، الناس ازاي بتفكر، إيه المشاكل اللي بيمروا بيها، وازاي بيتعاملوا مع المشاكل دي، ناس هتحس إنهم شبهك، وناس هتحس إنك ممتن لمقابلتهم في عمل فني، لولاه ماكنتش هتعرف عن وجودهم.

قائمة الأفلام السنة دي بتضم قصص فرضها علينا العالم في أحداث السنة، ممكن تعرف أكتر عن الأوكرانيين اللي عالقين في الحرب، حياتهم اليومية وصراعاتهم اتحولت ازاي في يوم وليلة، ممكن تعرف كمان عن بطلتين سوريتين أنقذوا مركب كانوا بيهربوا بها من جحيم الحرب في فيلم “السباحتين”.

وده اللي بتضمه قائمة الأفلام اللي هتتعرض السنة دي، حوالي 100 فيلم من دول مختلفة بقصص وحكايات كتير، تقدر تعرف عن تفاصيلهم ومواعيد وأماكن عرضهم في فترة المهرجان من هنا:

‎باقي يومين على بدء الدورة ٤٤ من مهرجان القاهرة السينمائي الدولي، وجاء وقت الإعلان عن جدول عروض الأفلام! العروض ستبدأ من…

Posted by Cairo International Film Festival on Friday, November 11, 2022

اقتراحات

ولو حابين اقتراحات، ماتفوتوش مشاهدة الأفلام المصرية اللي بتشارك في المهرجان السنة دي، واللي منهم فيلم “19 ب” من بطولة سيد رجب وفدوى عابد وناهد السباعي، وبيشاركهم في البطولة حيوانات الشارع كبطل رئيسي لأول مرة في قصص وحكايات الفيلم، لإن المخرج أحمد عبد الله قرر يقدم لنا أبطال بنشوفهم يوميًا لكن محتاجين نبص لهم بشكل تاني.

الندوات

تعرف إنك ممكن تشوف الفنانة لبلبة وكمان تسألها في ندوة إعلامية؟

الفنانة لبلبة بتتكرم في المهرجان السنة دي بجائزة إنجاز العمر، وهتكون موجودة في ندوة يحضرها الجمهور العام، التذاكر للندوات أو الأفلام بتكون متاحة في شباك تذاكر الأوبرا، تقدر تحجزها بسهولة من هناك.

‎باقي يومين على بدء الدورة ٤٤ من مهرجان القاهرة السينمائي الدولي، وجاء وقت الإعلان عن جدول عروض الأفلام! العروض ستبدأ من…

Posted by Cairo International Film Festival on Friday, November 11, 2022

مش بس لبلبة، فنانين ومخرجين عرب وأجانب، وكُتّاب وروائيين وصناع سينما كتير هيكونوا موجودين في الدورة الـ 44 من المهرجان، وجدول الندوات والمحاضرات متاح دلوقتي على الموقع الرسمي للمهرجان.

أيام القاهرة لصناعة السينما تفتخر بتقديم النجمة الكبيرة لبلبة بجائزة إنجاز العمر. يستضيف أمير رمسيس في جلسة لطيفة…

Posted by Cairo International Film Festival on Tuesday, November 8, 2022

في الندوات والمحاضرات، تقدر تشارك وتتعلم من نجوم وصانعي السينما من أنحاء العالم، وتشوف نجومك اللي بتحبهم وتحاورهم كمان، وكل ده مش بعيد عنك، مهرجان سينمائي في قلب القاهرة لكن جايب لك السينما العالمية في عاصمتك.

التذاكر

حضور ومشاهدة الأفلام وفعاليات المهرجان المختلفة في جدوله بتكون بحجز التذاكر من دار الأوبرا المصرية، والأسعار على حسب كل حدث، لكن بتبدأ من 50 جنيه لحد 80 جنيه، وبتختلف كمان في قاعة عرض الحدث أو الندوة، سواء في دار الأوبرا نفسها أو في مسرح الزمالك أو في مركز التحرير الثقافي، لإن التلات أماكن هتشهد فعاليات الدورة الـ 44 من المهرجان.

وتقدر تعرف تفاصيل أكتر عن التذاكر من هنا

آخر كلمة: ماتفوتوش قراءة: تفاصيل المؤتمر الصحفي لمهرجان القاهرة السينمائي الدولي في دورته الـ44

تعليقات
Loading...
Tweet
Share
Share
Pin