في شهر التوعية بالصحة النفسية: إيه العلامات اللي تقولك إن صحتك النفسية محتاجة لاهتمام؟

بعد سنين طويلة من إهمالنا لقضية الصحة النفسية، والاعتراف إن العلل والأمراض النفسية محتاجة اهتمام وعلاج زيّ أي مرض عضوي بنروح للدكتور علشان نفحصه ونعالجه، أخيرًا بدأنا نشوف في السنوات الأخيرة اهتمام أكبر بقضايا الصحة النفسية، وكسر وصمات العار اللي بتلاحق أي شخص يقرر يعترف إنه بيعاني من مرض نفسي أو إنه بيزور أخصائي أو دكتور أمراض نفسية. وبما إن شهر مايو هو شهر التوعية بالصحة النفسية، قررنا إننا نناقش بعض العلامات والدلالات اللي تقولك إن صحتك النفسية محتاجة لرعاية واهتمام أكبر، وفقًا لـمؤسسة Real Depression Project، لكسر حاجز الخجل وعلشان نـ “normalize” طلب المساعدة الطبية وقت اللزوم.

تغيير في نمط النوم

عن: iStock

نظرًا للظروف الحياتية ومسئوليات الدراسة والشغل، فمن الطبيعي إن يحصل لغبطة في جدول أو مواعيد النوم. لكن لو لقيت إن حصل تغيير بشكل كبير ومفاجىء سواء بالنوم لساعات طويلة أكتر من المعتاد، أو عدم القدرة على النوم خالص، يبقى دي علامة لازم تاخد بالك منها.

سرعة الغضب أو الانهيار من أبسط الأشياء

عن: Tik

في معظم الأحيان، الانهيارات المفاجئة أو ردود الأفعال الغاضبة أو المبالغ فيها، بيكون نتيجة تراكمات كتير من الأفكار والمشاعر السلبية، اللي الشخص ماتكلمش فيها أو حاول يحلها، وبالتالي قدرة تحمله بتقل وبيبدأ ينهار من أقل حاجة. علشان كده لما تشوف الكوميكس اللي بتتكلم عن شخص بقى ممكن يعيط لو السكر في الشاي بتاعه ماكانش مظبوط، اعرف إن بجانب الهزار، ممكن الشخص ده يكون فعلًا بيمر بحالة نفسية سيئة ومحتاج يـ communicate مشاكله.

عدم القدرة على الاستمتاع

أكيد من وقت للتاني طبيعي إن الإنسان ممكن يحس بملل، ولكن لو لقيت نفسك فاقد الشغف والشعور بالسعادة أثناء ممارستك للأنشطة أو الحاجات اللي في الطبيعي بتجيب لك سعادة، يبقى دي علامة مهمة ومؤشر إن صحتك النفسية مش في أفضل حالة.

تفضيل العزلة

في ناس بطبيعتها بتحب الاختلاء بنفسها وتقضية بعض الأوقات لوحدها، لكن لو مش دي طبيعتك وبدأت تحس في الرغبة في الابتعاد عن الأهل والأصدقاء وتفضيل العزلة من العلامات الواضحة اللي تقولك إن في مشكلة. كمان عدم الاتفاق على مواعيد أو خروجات خوفًا من إنك ماتقدرش نفسيًا إنك تحضرهم من العلامات دي.

آخر كلمة: صحتنك النفسية غالية، ولازم تحافظ عليها وتهتم بيها في حالة شعورك إنك بتمر ببعض من العلامات دي.

تعليقات
Loading...
Tweet
Share
Share
Pin