في ذكرى وفاته، تعالوا نفتكر أبرز المحطات في حياة الفنان الراحل محمود الجندي

زي النهارده من سنتين، رحل عن عالمنا النجم محمود الجندي عن عمر يناهز الـ 74 سنة بعد ما تعرض لوعكة صحية.. ولإن محمود الجندي من الفنانين الكبار اللي سابوا علامة وأثر في تاريخ السينما والدراما، حابين نتكلم النهارده عن أبرز أعماله السينمائية والتلفزيونية، وناخدكم في رحلة صغيرة لمشوار حياته، تخليدًا لذكراه..

قبل التمثيل

رغم حب محمود الجندي لمهنة التمثيل، لكنه درس في الأول في مدرسة الصنايع وتخرج من قسم النسيج، وبعدها اشتغل في أحد معامل النسيج. ولكنه قرر بعد كده إنه يلتحق بالمعهد العالي للسينما وتخرج منه سنة 1967، وبالرغم من كده ماقدرش يشتغل في مهنة التمثيل بسبب حرب أكتوبر بين مصر وإسرائيل واللي استمرت سبع سنين، وكان موجود محمود الجندي في صفوف القوات المسلحة وقتها في سلاح الطيران. وبعد ما الحرب خلصت بدأ بعدها يحقق حلمه في إنه يكون ممثل.

أهم الأعمال الفنية

عن: لها

قدم الفنان الراحل حوالي 107 فيلم سينمائي و 196 مسلسل و34 عمل مسرحي خلال مشواره الفني، وكمان كان بيتميز بصوت جميل فكان بيأدي بعض المشاهد الغنائية وكمان عمل ألبوم غنائي باسم فنان فقير سنة 1990، ولكنه قال إنه ماحبش المجال الغنائي علشان كده بعد عنه..

ابتدى نجاحة سنة 1979 لما شارك في المسرحية الكوميدية “إنها حقًا عائلة محترمة” مع الفنان فؤاد المهندس والفنانة شويكار، واللي حققت نجاح جماهيري كبير وقت عرضها على المسرح. وبعدها مسلسل “دموع في عيون وقحة” سنة 1980 اللي مثل فيه محمود الجندي دور الأب والابن، وحقق نجاح كبير ولفت الأنظار لموهبة محمود الجندي. وبعدها استمر في تقديم كتير من الأعمال السينمائية في التسعينات منهم أفلامه في التسعينيات، زيّ كارت أحمر ودرب العوالم وجدعان الحلمية والمليونير الصعلوك والتوت والنبوت وصراع الحسناوات وأولاد ضرغام وطريق الشيطان وحدوتة مصرية.

ومن أبرز المسلسلات اللي قدمها الشهد والدموع بكل أجزائه من سنة 1983-1985 ومسلسل حديث الصباح والمساء وزيزينية اللي حققوا نجاحات كبيرة وقت عرضهم واللي كان محمود الجندي من أهم أبطال الأعمال دي. ومسلسلات تانية زيّ الحب أقوى وأبو القاسم الطنبوري وإخوانه، والناس في كفر عسكر، والمصراوية، وغيرهم كتير من الأعمال.

أما في السنوات الأخيرة، فقدم مجموعة كبيرة من الأعمال الناجحة سواء الدرامية أو الفنية، زيّ أفلام “واحد من الناس، وخارج على القانون، والحرب العالمية التالتة، وسمير وشهير وبهير، ومن 30 سنة” اللي كان معظمهم بيقدم فيهم أدوار الأب، وكان دوره بيبقى إضافة كبيرة للعمل الفني. وشارك في مسلسلات كبيرة زيّ الدالي والملك فاروق وفي إيد أمينة ورقم مجهول وحكاية حياة والطوفان.

آخر كلمة: ماتفوتوش قراءة “في ذكرى وفاة عبد الحليم حافظ، تعالوا نسترجع أهم المحطات في حياته“…

تعليقات
Loading...
Tweet
Share
Share
Pin