في ذكرى ميلاد الفنان القدير أنور وجدي، تعالوا نفتكر حياته وأهم أعماله

اتولد الفنان محمد أنور وجدي في 11 أكتوبر سنة 1904، وهو من أصول سورية، فكانت أسرته تعمل في تجارة القماش، وراحوا يعيشوا في مصر في أواخر القرن الـ 19، وتعلم في مدرسة الفرير الفرنسية، وهي نفس المدرسة اللي اتعلم فيها فنانين كتير زي فريد الأطرش، وأسمهان، ونجيب الريحاني، وبعد اتقانه للغة الفرنسية واحساسه بأخذ قدر كافي من التعليم، قرر يسيب التعليم ويتجه للفن.

كان حلم أنور وجدي إنه يسافر لأمريكا ويشتغل هناك في سينما هوليوود، ولكن كل محاولاته للسفر فشلت، وبدأ مشواره في شارع عماد الدين وتحديدًا في مسرح رمسيس مع المخرج يوسف وهبى، فشارك في مسرحية “يوليوس قيصر”، بعد كده ساب تمثيل المسرح واتجه لتمثيل السينما، وشارك مع أبرز النجوم زي صباح، وليلى مراد، وحسين صدقي في أفلام ناجحة كتيرة زي “شهداء الغرام”، و”كدب في كدب”، و”القلب له واحد”، و”سر أبي”، و”ليلى بنت الأغنياء”، و”عنبر”، و”أمير الانتقام” اللي مأخوذ من رواية “المونت كريستو” ومن أهم أفلامه “العزيمة” اللي بيعتبر من أهم الأفلام السينما المصرية.

أنور وجدي مانجحش ف التمثيل وبس، فهو أثبت نفسه وقدراته في الإخراج، والإنتاج، وكتابة السيناريو كمان، ففي سنة 1945، أنتج أول فيلم له “ليلى بنت الفقراء” وكتب السيناريو كمان، اللي حقق نجاح كبير، فقام بإنتاج وتأليف أفلام تانية زي “قلبي دليلي”، و”بنت الأكابر”، و”غزل البنات”، و”أربع بنات وظابط”، و”حبيب الروح”. واكتشف الطفلة “فيروز” اللي سموها “شيرلي تمبل المصرية” وكانت أشهر طفلة في تاريخ السينما المصرية، وأنتج لها أفلام زي “ياسمين”، و”فيروز هانم”، و”دهب”. واهتم أنور وجدي بالرقص والغناء والعروض الاستعراضية في أفلامه.

تزوج أنور وجدي من الممثلة المصرية “إلهام حسين” ولكنهم انفصلوا بعد ستة شهور فقط، وتزوج من ليلى مراد اللي قصة حبهم كانت من أشهر الحكايات الرومانسية، وشاركوا في أعمال فنية كتير جدًا مع بعض، ولكنهم انفصلوا بعد سبع سنين، وتزوج من ليلى فوزي وانتهي زواجهم بعد أربع شهور بوفاته في سنة 1955. توفى الفنان القدير أنور وجدي بسبب إصابته بمرض وراثي في الكلية في بداية خمسيناته، بعد محاولات كتيرة للشفاء لكن ماكانش في علاج وقتها لمرضه اللي كان مرض الكلية المتعدد الكيسات. ولكنه ساب بصمته في عالم السينما المصري والعربي بأفلامه الناجحة سواء في التمثيل، أو الإخراج، أو الإنتاج، أو التأليف.

آخر كلمة: شاركونا ايه أكتر فيلم بتحبوه للفنان القدير أنور وجدي.

تعليقات
Loading...
Tweet
Share
Share
Pin