في دور جديد وإطلاله مختلفة، نيقولا معوض يجسد النبي إبراهيم في فيلمه الجديد “إبنه الوحيد”…

بعد ما تم الإعلان عن تأجيل نزوله في دور العرض بسبب الوضع الناتج عن فيروس الكورونا المستجد، تريلر الفيلم المنتظر للفنان اللبناني نيقولا معوض “إبنه الوحيد” نِزِل على اليوتيوب، وفي وقت قريب جدًا هيكون متاح على شاشات السينما الأمريكية.

في الفيلم، معوض بيلعب دور النبي إبراهيم وبتدور الأحداث حوالين قصة التضحية بإبنه طاعةً لأمر الله. شارك في بطولة الفيلم النجوم سارة سيد، آدان موسكوفتز، أوتافيو تاداي، نيكولاي بيريز، سيناريو وإخراج ديفيد هيلينج. وانتاج ROCKBRIDGE PRODUCTIONS.

معوض ظهر في الفيلم بشكل مختلف مشوفناهوش بيه قبل كدا، فالفنان أطلق لحيته وربى شعره استعدادًا للدور، وفي كتير من مشاهد الفيلم بتظهر عليه ملامح الآسى والتعب من حجم الحِمل اللي الدور اللي كان بيجسده كان شايله. الدور هيكون مختلف عن أي حاجة نيقولا معوض قدمها قبل كدا.

في الأول الفيلم المفروض كان هينزل في السنة دي، وكان من المتوقع ليه إنه هيترشح لعدد من الجوائز والمهرجانات العالمية، لكن بسبب جائحة “كوفيد-19″، كل الخطط وقفت لحد ما الحياة تبدأ ترجع لشكلها الطبيعي.

نيقولا معوض تم اختياره من بين 1700 ممثل تقدموا للدور من كل أنحاء العالم، وهو نجم لبناني ظهر في كتير من المسلسلات المشهورة في مصر ولبنان والإمارات العربية المتحدة زي ونوس وأبرياء ولكن، وقريب هنشوفه على شاشات رمضان مع النجمة مي عز الدين في مسلسل خيط حرير من تأليف محمد سليمان عبد المالك، وإنتاج شركة سينرجى، وإخراج إبراهيم فخر. هتقدروا تشوفوا نيكولا في فيلمه المصري الجديد “ماكو”، واللي هيكون أول بطولة ليه في السينما المصرية،

بجانب حبه للفنون وأعماله الكتير، معوض بيلعب واحد من أهم أدوار التوعية في مصر والشرق الأوسط، فهو مؤخرًا بقى سفير للحملة العالمية لمكافحة الإيدز في مصر، ودايمًا في منشوراته على السوشيال ميديا بيوعي الجمهور بضرورة الفحص الطبي الوقائي للكشف عن المرض في مراحله الأولى.

أخر كلمة: متنسوش تتابعوا مقابلتنا الحصرية مع نيقولا معوض يوم الإتنين اللي جاي على #ورا_السيما!

تعليقات
Loading...
Tweet
Share
Share
Pin