في اليوم العالمي للمرأة الريفية: أشهر أدوار عبرت عنهم في السينما المصرية

السينما المصرية قدمت في تاريخها أدوار كتيرة عن المرأة الريفية “الفلاحة” منها كانت الست القوية اللي ممكن تلجأ للمكر والحيلة علشان توصل للي هي عايزاه، ومنها الضعيفة المغلوب على أمرها بسبب ظروف حياتها، ومنها اللي قادرة تجيب حقها وتقف في وش الظلم، وفي اليوم العالمي للمرأة الريفية حبينا نفتكر أشهر أدوار اتعملت في السينما المصرية وعبرت عنها وعن أحلامها وهمومها ومشاكلها.

فاطمة – الزوجة التانية

عن: عين

سعاد حسني قدمت أكتر من دور للفلاحة المصرية في أعمالها الفنية، كان أولهم فيلم حسن ونعيمة، لكن الدور اللي أبدعت فيه كان في فيلم الزوجة التانية، واللي اتصنف ضمن أفضل 100 فيلم في السينما المصرية، وبسبب الفيلم ده برضه سعاد أخدت لقب “الفلاحة الأجمل في السينما المصرية”.

آمنة – دعاء الكروان

بسبب طبيعتها الهادية، الناس ماكانتش متخيلاها أبدًا تعمل دور زيّ ده، دورها في فيلم دعاء الكروان اللي مثلت فيه دور الست الريفية اللي قررت إنها تتحول من واحدة ضعيفة بين أهلها، لواحدة عايزة تنتقم من اللي اتسبب في موت أختها، وهتقرر إنها تستخدم كل الحيل علشان توقع أحمد مظهر في حبها وتنتقم منه.

فؤادة – شيء من الخوف

ومين فينا نسي أشهر جملة اتقالت في السينما المصرية؟ “جواز عتريس من فؤادة باطل” في فيلم شيء من الخوف، وهنا أدت شادية دور مختلف بيعبر عن الفلاحة المصرية صاحبة الملامح البسيطة اللي هتقف قدام الظلم اللي بيتعرض له الفلاحين في قريتها من غير أي خوف، وكانت أشجع من أي رجل.

نعمة – أفواه وأرانب

دور تاني للفلاحة المصرية لفاتن حمامة أبدعت فيه مع الفنان محمود ياسين، بس جسدت فيه دور مختلف عن دعاء الكروان، وكانت فيه الست المسئولة المستقلة اللي شايلة حمل عيلتها كلها، وفي نفس الوقت عندها طموح إنها تبقى أحسن وتتعلم وتطور من نفسها برغم كل الظروف اللي عايشاها.

فتحية – النداهة

جسدت فيه الفنانة ماجدة دور الست اللي طول حياتها عايشة وسط القرى والأرياف، وهتتصدم في أول يوم هتيجي فيه القاهرة وشكل الحياة المختلف والواقع اللي غير الصورة المرسومة في خيالها عن المدينة.

مصر قدمت على مدى تاريخها الفني أكتر من 4000 فيلم ناطق، ده غير الأفلام الصامتة اللي اتعملت، بس في كل الأفلام دول عدد الأفلام اللي اتعملت وعبرت عن المرأة الريفية، مايتعداش الـ33 فيلم وكانت في حقبة زمنية معينة، بس لو جينا في فترة الألفينات مش هنلاقي تقريبًا ولا فيلم اتعمل وكان بطلته ست بسيطة جاية من القرى.

يمكن ده بسبب إن مفهوم الأرض والقرية اختلف عن زمان؟ أو بسبب إن كل الناس بقت تسيب أرضها وتروح العاصمة؟ بس حتى لو ده كان السبب، لسه في قضايا كتيرة ومشاكل وهموم بتعاني منها الست هناك ماحدش بيسمع عنها، محتاجين نسلط الضوء عليها الفترة اللي جاية في أعمالنا الفنية.

أخر كلمة: ماتفوتوش قراءة: الفيلم ولا الرواية؟ أشهر أفلام مصرية كان أصلها روايات

تعليقات
Loading...
Tweet
Share
Share
Pin