كالعادة، في الويك إند بتبقى الخروجة اللي بنستناها بفارغ الصبر، ونفكر هنعمل إيه، خصوصًا لو في آخر الشهر بقى والفلوس بنقول عليها يا رحمن يا رحيم، بس برضه عايزين نشوف صحابنا ونخرج خروجة حلوة نخلص بيها من ضغط الأسبوع كله، علشان كده فكرنا في أماكن تكون فسحة مختلفة وأسعارها برضه تسمح بيها ميزانية آخر الشهر، والمره دي الخروجة هتبقى في الجيزة، بأماكن لعب وجناين ومطاعم على view الأهرامات، وكمان أماكن تقضي فيها اليوم كله بطريقة مختلفة.. وعلشان إحنا معظمنا بيبقى همه الأكل أكتر فإحنا هنبدأ بأماكن الأكل الأول..
Cleopatra Bistro
بتشوف دلوقتي الصور الوهمية للناس على السوشيال ميديا في مطاعم وكافيهات بمنظر تحفة على الأهرامات؟ وبتفتكر إن الاماكن دي طبعًا بأسعار خرافية علشان دي تعتبر أهم منطقة سياحية مشهورين بيها في العالم، لكن فيه مكان بـ view تحفة على الأهرامات، وبأسعار ومنيو بسيط بالنسبة للأسعار السياحية للأماكن دي، بـ 150 جنيه للفرد، تقدر تطلب فطار يعتبر وليمة مصرية أصيلة، وأسعار قهوة بتبدأ من 20 جنيه، وبيتزا وباستا أسعارهم في حدود الـ 150 جنيه اللي هما الـ minimum في المكان.
بلد الغريب
مطعم في أكتوبر في لاسيتيه مول في المحور المركزي، الحي الثامن، عاملين دايمًا عروض على السندوتشات والوجبات وهيخلوك تحب السي فود، العروض على وجبات من سندوتشين ومشروب بتبدأ من 100 جنيه، ادخلوا على صفحتهم وشوفوا العروض دايمًا وكل جديد هناك.
شاي بليمون
موجود في 50 ميدان عمان في المهندسين، والمكان حلو أوي ومتقسم على تلاتة: indoor، outdoor، وبلكونة، يعني اختار المكان والجو اللي عايز تقعد فيه، وأسعاره بسيطة مش غالية، وبيعمل كبدة وسجق وحواوشي جامد، وبيتزا وباستا وكل اللي الحاجات اللي مالهاش علاقة بالدايت دي.
وبعد ما ناكل دايمًا بنبقى عايزين نتمشى أو نعمل حاجة نهضم بيها وننبسط أكتر.. فدي أماكن ممكن تروحوها بعد ما تاكلوا.
حديقة الأورمان
غير إنها حديقة مميزة بسعر رمزي، دلوقتي كمان عندك فرصة إنك تلحق معرض الزهور اللي بيقام فيها، وتستمتع بفسحة مميزة تحسسك بأجواء الربيع، وتشتري نباتات مختلفة بأسعار تبدأ من 10 جنيه. المعرض مستمر لحد يوم 13 أبريل، ومتاح من الساعة 9 الصبح، بيعرض أكتر من 40 نوع من النباتات والأزهار المختلفة.
متحف مركب الشمس
أو “متحف مركب خوفو”، موجود في المنطقة الأثرية هضبة الهرم، بـ 20 جنيه بس، تقدر تشوف الجمال الفرعوني ده، المتحف بيعرض المركب اللي تم العثور عليها في الجهة الجنوبية لهرم خوفو، واتسمت مركب الشمس علشان الرأي اللي بيرجع لإنها صنعت علشان يستخدمها الملك في الرحلتين بتوعه يوميًا مع إله الشمس، ورأي تاني بيقول إن المركب استخدمت لنقل جثمان الملك من ضفة النيل الشرقية للضفة الغربية اللي اتدفن فيها.
نادي الرماية
الميزة إنك مش لازم تبقى عضو علشان تستمتع بوقت هناك وتتمرن، لو عايز تجرب حاجة مختلفة مع صحابك، خدهم وروحوا وجربوا تضربوا نار وتتعلموا وتلعبوا، موجود في الهرم، والأسعار بسيطة، النادي تابع للقوات المسلحة، وبيوفر للمدنين فرصة دخوله والاستمتاع بالمساحات الواسعة اللي فيه، وفيه أنشطة كتير ممكن تتعمل زيّ ركوب الخيل، وزيّ الرسم على التمثايل الجير، وتأجير العجل، وكل ده بأسعار بسيطة جدًا.
القرية الفرعونية
الجيزة مشهورة بإن فيها أشهر معالم سياحية، ومنهم القرية الفرعونية، هتقضي فيها يوم مختلف تعرف فيه حضارة الفراعنة اللي بنت التاريخ، بجولة كاملة، تشوف فيها حياتهم ومعالمها وناس لابسين لبس الفراعنة ومنتجات من العصر ده، وتسمع وتشوف قصص عن كل مكان في القرية، وكل ده بأسعار مختلفة حسب الجولة اللي هتحب تعملها هتكون عبارة عن إيه، لكنها بتبدأ من 100 جنيه، القرية الفرعونية موجودة في الجيزة، في شارع البحر الأعظم.