بقالنا فترة مش بنصادف إجازات في متتالية الشهور اللي احنا فيها دي، ومفتقدين الإجازات الجميلة دي اللي بتلزق تلات أيام في بعض، دي فرصة ذهبية إنك تخطف سفرية سريعة يوم الخميس الجاي في إجازة 6 أكتوبر، وتقضي الخميس والجمعة والسبت في مكان لذيذ وتلحق سفرية قبل الشتاء. قولنا نقترح أماكن ومدن جوا مصر السفر ليها مش بياخد وقت كبير في الطريق، علشان تلحق تستمتع بالتلات أيام دول في جو مختلف، من غير ما تفرهد في الطريق.
السويس
من أحلى المدن الساحلية في مصر، هتعجبك الأجواء فيها لو أنت اتعودت تسافر إسكندرية وخلاص حابب تغير وتشوف أماكن جديدة. السويس هتكون اختيار مثالي للإجازة، مدينة هادية والجو فيها مش حر، خصوصًا في الوقت ده من السنة، كمان حط في اعتبارك إن يوم الإجازة دي بتوافق اعتدال في درجات الحرارة، فهتستمتع بإجازة في جو لطيف، لا هو حر ولا هو برد.
المدينة نفسها فيها معالم مختلفة من أيام الفرنسيين، شكل البيوت والشوارع هيدي لك انطباع مختلف عن أماكن في مصر، بأسلوب مختلف عن اللي متعود تشوفه.
وطبعًا مستحيل تبقى في واحدة من أعظم المدن الساحلية وتفوّت أكلة سمك خرافية على البحر، وفي الحالة دي بنرشح لك مطعم جربناه في سفرية صد رد، وكان عنده كل ما لذ وطاب من مأكولات البحر؛ مطعم “فارس”.
الإسكندرية
بطلة السفريات السريعة وسفريات الصد رد كمان، ساعتين من القاهرة وتبقى هناك واقف على البحر بتشم هوا نضيف، وكمان الرطوبة اللي في الجو دي ومشهورة بيها الإسكندرية هتكون هديت والجو بقى أحسن على آخر الأسبوع، فتقدر تسافر لها بقلب جامد من غير ما تشيل هم الجو.
من التمشية في شوارع إسكندرية والقعدة على البحر، وتجربة مطاعم سمك مختلفة، وطبعًا تجربة الرز باللبن والآيس كريم في كذا مكان، في أكتر مدينة مشهورين فيها. كل دي حاجات تعملها في إسكندرية تخلّي إجازتك لطيفة، وتفصل بيها من جو الشغل والروتين.
في السفرية دي، بنقترح عليك تجرب الأتوبيس اللي بدورين الأحمر ده، زيّ اللي في لندن، ده بقى هيلففك على الكورنيش وتقدر تشوف منه إسكندرية كلها تقريبًا، بس وأنت قاعد في الدور التاني حاطط رجل على رجل.
في بداية اليوم، ممكن تروح تفطر في “محمد أحمد” أشهر مطاعم الفول والفلافل في إسكندرية -أوعى تقول عليها طعمية هناك- وبعد الفطار تزور مكتبة الإسكندرية أو قلعة قايتباي، وطبعًا ماتفوتش التمشية بليل على كوبري ستانلي، مع الهوا المنعش وأضواء المدينة.
العين السخنة
علشان ماتشيلش هم الطريق، العين السخنة كمان قريبة من القاهرة والسويس، وتقدر تسافر لها سفرية سريعة وتبقى توديع للصيف والبحر والبلبطة. استغل إن البرد لسه مادقش البيبان وعلي الحجار لسه ماطلّش علينا، والحق انزل البحر وخد تان وعيش أجواء الصيف بعيد عن شهور الصيف الزحمة.
المدينة نفسها حتى تعتبر مصيف هادي مش زحمة، فتقدر تفضي دماغك وتستجم هناك بسهولة وتشم شوية هوا نقي، ترجع بعدها مقبل على الحياة، وقادر تدخل في صراعات العاصمة مرة تانية.
العين السخنة بالنسبة لباقي المدن يعتبر مافيهاش أنشطة تتعمل، بس هي الوجهة المثالية للاستجمام وأجواء المصيف الهادي، اللي هيخليك تفرّغ كل طاقتك السلبية، وتاخد نفس عميق كده وتبطل جري في الحياة.
رأس سدر
دي كمان جوّها جو استجمام، بس مش هتلاقي في المدينة نفسها حاجات كتير تتعمل أو أنشطة أو أماكن فسح، بس راأس سدر من أكتر الأماكن الصافية والهادية والمياه فيها من أجمل ما يكون.. علشان كده لو أنت شخص مش بيحب يعمل أنشطة ويلف ويتفسح، رأس سدر هتكون اختيار مثالي ليك في الإجازة دي. كمان الطريق من القاهرة مش هيكمل 3 ساعات، فالسفرية تستاهل تستجم فيها تلات أيام خطف كده.
الفيوم
أهي دي كمان من اختيارات الناس الهادية اللي هدفها في السفر تفضي دماغها، مش عايزين فرهدة وخروجات. في الفيوم، عندك فرصة تعيش حياة هادية وشبه بدائية من غير تكنولوجيا ولا موبايلات ولا تلفزيون، ولا أي حاجة من مظاهر الحياة الحديثة، وده في قرية تونس. لو محتاج فعلًا تفضي بطاريات دماغك خالص وتشحن طاقتك من الأول وتبعد عن كل حاجة، بنرشح لك قرية تونس تقضي فيها اليومين الإجازة دول.
وغير قرية تونس، الفيوم بشكل عام بتتميز بالأجواء الهادية دي، ممكن تروح وادي الريان اللي يعتبر أشهر معالم الفيوم، وادي وشلال وسما صافية، مش هتبقى سامع حواليك غير صوت المياه وزقزقة الطيور. منتهى الروقان والاستجمام اللي ممكن تبقى محتاجهم في إجازة.
رشيد
ممكن يبقى اقتراح ماشوفتوش في مكان قبل كده، بس فعلًا مدينة رشيد من الأماكن اللي مش واخدة حقها، رغم إنها كمسافة مش بعيدة، وفيها أشنطة مختلفة ممكن تعملها زيّ الصيد، وهتشوف فيها نهر النيل كما لم تراه من قبل، وهتحس إنك أول مرة تشوفه.
فلو أنت بتحب الصيد، ممكن السفرية في الإجازة دي تبقى لرشيد، غير إنها من الأماكن الجميلة والهادية اللي مش معروفة لناس كتير، والمشوار ليها برضه مش بياخد وقت كبير، فتقدر تروحها في يوم واحد لو حابب، وتستمتع برحلة صيد مع أصحابك، ويوم هادي ورايق تستجموا فيه، وتريحوا أعصابكم من الضغط اللي كنتوا فيه طول الأسبوع.