فيضان السودان: مصر ترسل 184 طن من المواد الغذائية كمساعدة أولية عاجلة لإغاثة السودان

للاسف كلنا شوفنا الكارثة اللي حصلت في السودان بسبب نزول أمطار موسمية غزيرة أدت لارتفاع منسوب مياه النيل اللي وصل ل17,48 متر، وحطم الأرقام القياسية في ال 100 سنة اللي فاتوا، وأحدث دمار كبير وخسائر فادحة. وبسببه الشعب السوداني بيعاني بشكل مؤسف في الوقت الحالي فكتير خسروا بيوتهم ومبقاش ليهم أختيار، والشوارع غرقانة لحد دلوقتي والوضع كل شوية بيبقي أصعب.

علشان كده قامت وزارة التضامن الاجتماعي المصرية بالتعاون مع 8 من الجمعيات الأهلية بإرسال مساعدات للسودان شملت 184 طن مواد غذائية من ضمنهم الدقيق، والرز، والسكر، والمكرونة، و10 آلاف بطانية، وخيم للإغاثة، وأدوات تعقيم، وكحول.

وفي مداخلة هاتفية لوزيرة التضامن الاجتماعي نيفين القباج في برنامج “علي مسئوليتي”، وضحت الوزيرة إن دي بتعتبر مساعدة أولية لإغاثة السودان، وإن هناك متابعة مستمرة للتوابع اللي نتجت من الفيضان، والمساعدات اللي هتقدمها مصر للسودان الشقيقة هتتم علي مراحل. ومن ناحية تانية، بتحضر حاليًا القوات المسلحة المصرية بالتنسيق مع الأزهر الشريف والهلال الأحمر لتقديم دعم طبي وعلاجي للسودان.

وبالإضافة للجهود الرسمية في مصر، المجتمع المدني كمان بادر بإرسال مساعدات وتبرعات للسودان زي جمعية “مرسال” الخيرية اللي هتبعت قافلة النهارده بمساعدات متنوعة للسودان.

آخر كلمة: كل دعوتنا ودعمنا لأهل السودان!

تعليقات
Loading...
Tweet
Share
Share
Pin