أخبار جميلة قالتها الدكتورة إيمان شاكر، وكيلة مركز الاستشعار عن بُعد بهيئة الأرصاد الجوية. وضحت شاكر إن يوم الأربع، 22 سبتمبر كان بداية فصل الخريف رسميًا في مصر. وقالت إنه بداية من النهارده، الخميس هتبدأ درجات الحرارة تنخفض بشكل تدريجي من درجتين إلى خمس درجات. بكده درجات الحرارة على القاهرة خلال النهارده، الخميس مش هتتعدى 32 درجة، وبداية من بكرا، الجمعة هتوصل إلى 30 درجة.
انخفاض درجات الحرارة واعتدال الجو من الحاجات اللي بتميز فصل الخريف بالإضافة إلى اعتباره بداية فصل الأمطار بالذات في مصر. وعلى حسب كلام دكتورة إيمان شاكر؛ فرص سقوط الأمطار بداية من النهارده، الخميس هتكون من 30 إلى 60% وهتبدأ من بالليل وتمتد على محافظات الوجه البحري زيّ الإسماعيلية وبورسعيد والسويس، وهتوصل يوم الجمعة على مناطق مختلفة من القاهرة. وبكده من المتوقع إن بكرا، الجمعة هتكون في أمطار خفيفة على القاهرة.
ورغم إن دكتورة شاكر قالت إن فصل الخريف هو واحد من أكتر فصول السنة اعتدالًا، لكنها حذرت من إنه ممكن يكون في حالات من عدم الاستقرار وتوقعت سقوط السيول بالذات على سلاسل البحر الأحمر أو سيناء بسبب الطبيعة الجبلية للمناطق دي.
كمان أعلنت هيئة الأرصاد الجوية إنه بداية من النهارده، الخميس هيكون في نشاط رياح على مناطق من السواحل الشمالية وجنوب سيناء وشمال الصعيد على فترات متقطعة، ومن المتوقع إنه هيكون في اضطراب فى الملاحة البحرية على البحر المتوسط، لإن سرعة الرياح ممكن توصل لـ50 : 60 كم فى الساعة. وبالتالي لازم الناس اللي بتخرج بمراكب في البحر المتوسط تاخد بالها خلال الأيام اللي جاية.