النهاردة عيد ميلاد أمير عيد الفنان اللي بنحبه ويُعتبر من أول الناس اللي فتحت المجال لمزيكا جديدة في مصر، بنوع مختلف وكلمات بتعبر عن اللي جوانا وإحنا حتى مش عارفين نقوله عن نفسنا، سواء كلام عن نفسنا أو حياتنا أو كل اللي بنقابله في يومنا، والأغاني دي عايشة معانا سنين تُعتبر أحلى سنين في مرحلتنا العمرية، أمير عيد وأغانيه ومزيكته المختلفة من أول ما ظهر.. فتعالوا سوا نشوف إزاي الناس بتحب تغني معاه هو وفريق كايروكي في الحفلات وقد إيه بيكون مستمتعين وهما بيغنوا معاهم أكتر أغاني بيحبوها.
أغنية ليلى من أكتر الأغاني اللي علقت مع الناس واتشهرت، وكل ما بتتغنى في حفلة الناس بتندمج معاها وتغنيها، الأغنية عاملها أمير لليلى زوجته، اللي بالمناسبة عيد ميلادها هي كمان هيكون بكره.
كمان أغنية كان لك معايا، من أكتر الأغاني اللي اتشهرت، وهي متاخدة من أغنية أم كلثوم، وده فيديو من حفلة في باريس والناس مندمجة معاها وبتغني.
أما صوت الحرية، فهي تُعتبر من أسباب شهرة الفريق من سنة 2011، ومن أشهر أغانيهم اللي بتلاقي حب من الناس وبيغنوها في الحفلات، وده فيديو من حفلة قديمة ليها.
كمان أغنية يا أبيض يا أسود، من أكتر الأغاني اللي الجمهور حبها وتفاعل معاها خصوصًا في الحفلات.
ومن الحفلات القديمة لكايروكي، أغنية زحمة بتاعت أحمد عدوية، اللي كانوا بيحبوا يغنوها في الحفلات وبتلاقي تفاعل كبير من الجمهور وبتغير من جو الحفلة كتير.