جملة عايزة ورد يا إبراهيم، مابقتش جملة بيتم استخدامها كل عيد حب من الفراغ، لإنها جملة حقيقية، بقت أشبه بمطلب عند ستات وبنات كتير، مطلب من وجهة نظرهم مهم وبيعبر عن الاهتمام، في ستات بتقول إن اللي خلى معظم الرجالة في فترة الخطوبة بتبقى مهتمة بنقطة الورد أو الهدايا المعنوية. بس بعد الجواز، الموضوع عند بعض الرجالة بيتحول وطريقة التعبير عن الحب ممكن تختلف شوية. بحكم المسئوليات اتحول التعبير لحاجات مادية أكتر زيّ ما قال إبراهيم ليسرية في أحلى الأوقات “كيلو كباب أفيد” وفي منهم بيقول البيت أولى وأجبلها حاجة تفيدها وتستعملها أحسن.
وبرغم إن في ستات كتير بتتفق مع نفس وجهة النظر دي ومن رأيها برضه إن الورد ممكن يتم استبداله بحاجات تانية أفيد، بس لسه برضه الست بتشوف إن الورد رمز ومعنى للاهتمام والحب وأبسط طريقة ممكن الواحد يعبر بها عن مشاعره، حتى لو الست مش بتحب الورد بس مجرد إنه يوصل لها المعنى حتى لو بوردة واحدة هتبقى مبسوطة!
وفي الحقيقة إن الورد بالنسبة لستات كتير بتعتبره حتى أكبر من كده، بتعتبره رد على أسئلة كتير بتدور في دماغها، زيّ هو لسه بيحبني زيّ الأول ولا لأ؟ هو فاكرني في وسط زحمة الشغل ودوشة الحياة ولا لأ؟ أنا لسه باجي على باله ولا كل ده راح مع دوشة العيال؟ أسئلة كتير بتبقى في دماغ الست عن علاقتها بجوزها مش بتسألها. بس ممكن وردة واحدة تجاوب لها على كل ده.. تخيل!
” عايزة ورد ,إيه ماسمعتش؟.. نفسي في ورد يا إبراهيم.. وماتقولش بوكيه الورد بـ20 جنيه ونص كيلو الكباب أحسن منه! وإنك شايف الكباب رومانسي أكتر من الورد”.
يسرية – أحلى الأوقات
أنا عايزة ورد يا ابراهيم ??
فيلم “أحلى الأوقات” شغال دلوقتي على #روتانا_سينماPosted by Rotana Cinema on Monday, January 15, 2018
الموضوع ماكانش وليد اللحظة أو ظهر من كام سنة أو عادة أخدناها من الغرب، الورد اتعرف كرمز للحب والرومانسية قبل 35 مليون سنة! اكتسب شعبيته في الأساطير، وارتبط بالحب والتضحية، واتناولت الأساطير قصة الوردة الحمرا اللي نبتت لما بكت «أفروديت» بعد ما اتقتل حبيبها «أدونيس»، وعلى حد تعبيبرهم “إن دموعها اختلطت مع دمه وطلع من التراب وردة حمرا.”
الورد كان عنصر أساسي في حياة الملكات وأهم ستات في التاريخ زيّ كليوباترا اللي كانت بتملى غرفتها بالورد لاستقبال حبيبها وكانت بتملى حمامها بالورد الأحمر.
الورد مش بس للحبيبة، ومش مقتصر على عيد الحب، أنت ممكن في عيد الأم تجيب ورد لمامتك، ممكن لو حد تعبان تجيب له ورد وأنت بتزوره وتوصل له معنى إنساني جميل. ممكن تصالح حد بورد. ممكن تعبر به عن حبك لأهلك. ممكن في مناسبة سعيدة تبقى هديتك هي الورد. كل دي رسائل يقدر الورد يوصل لها. وغير كل ده، فالناس بتعتبره له تأثير إيجابي على الصحة النفسية وبيقلل من أعراض الاكتئاب.