“الصين دلوقتي بيصدروا وبيعملوا كل حاجة” جملة أكيد هتكون سمعتها عن منتجات مختلفة وفي مجالات كتير.. بس هل تتوقعوا إن إحنا نقول كده في الأعمال الكوميدية كمان؟ زيّ ما فوانيس رمضان وسجاجيد الصلاة بقت إنتاج صيني.. بقى في دلوقتي تقليد كمان لمشاهد كوميدية من مسرحيات وأعمال عربية.. اليوتيوبر الصينية آسيا قدرت تلفت الأنظار وتبهر الكتير بفيديوهاتها اللي بتقلد فيها عادل إمام وغيره من الفنانين العرب بطريقة كوميدية، واللي لفت نظر الكتير هو استخدامها لتعابير وجهها بطريقة شبيه جدًا للممثلين اللي قلدتهم، حتى لو كان إتقان اللغة مش بنسبة 100%.
آسيا درست اللغة العربية من 9 سنين، وكان تخصصها في الجامعة، وحتى بعد ما خلصت الدراسة الجامعية كملت مشوارها في تعلم اللغة العربية في الماجيستر.. وخلال لقائها مع برنامج BBC وضحت آسيا إنها منجذبة جدًا للحضارة العربية بشكل عام وده اللي خلاها تتجه لتعلم اللغة العربية اللي بمثابة “المفتاح” اللي تقدر منه إنها تكتشف أكتر عن الحضارة المصرية والعربية وتغذي شغفها بمعرفة أكتر عن الحضارة الفرعونية والأهرامات.
اليوتيوبر الصينية مش بس هي مهتمة بالفنانين العرب ولكن كمان بلاعبي الكرة المحترفين، زيّ محمد صلاح اللي عملت فيديو كامل عنه.. وبشكل لطيف ذكرت آسيا الحديث الشريف “اطلبوا العلم ولو في الصين” وقالت بعده إن لما الموضوع يتعلق بكرة القدم، بيبقى على الصين إن هى اللي تتعلم من الدول العربية، كناية عن إعجابها بمواهب لاعبي الكرة العرب.